ACARA IBADAH HANANAEK TUHAN JESUS

PARTURENA PARMINGGUON

ARI PARNINGOTAN HANANAEK NI TUHAN JESUS

DI HKBP PERUMNAS II BEKASI

================================================

1.    P a n g a r a d e o n

U     :   Hamu angka dongan sahaporseaon ! Na marlas ni roha do hita di tingkion marningot  hananaek ni Tuhanta Jesus Kristus tu harajaonNa di banua ginjang. Andorang so manaek Ibana tu harajaonNa i jumolo do di ajari huhut di podai Ibana angka siseanNa asa marbisuk jala margogo nasida laho mambaritahon Barita Nauli jala mangadopi angka na naeng masa. Antong mandok mauliate na hita tu Tuhanta jala ita puji ma Ibana. Marende ma hita!

Marende BE. 15 : 1 – 3    “Aut na saribu hali ganda”       BL 103

Aut na saribu hali ganda,  Saringar ni soarangki,

Naeng nasa gogo bahenonku, Mamuji Debatanta i,

Paboa las ni rohangki, Hinorhon ni pambaenna i

Tung sura sahat soarangku, tu ujung ni portibion,

Naeng nasa jolma haraonku, Mamuji Debata tongtong.

Tama do nasa hosangki, Hubaen pasangap Tuhan i.

 ( J o n g j o n g )

Unang ma modom ho, Tondingku! Sai ngot ma ho, sai hehe ma;

Radot ma ho diulaonmu, Sai puji Tuhan Debata.

Sai pangke nasa malomi, Mamujimuji Tuhan i.

 2.   VOTUM , INTROITUS,TANGIANG

U     :   Marhite-hite goar ni Debata Ama, dohot goar ni Anakna Tuhan Jesus Kristus, dohot goar ni Tondi Porbadia na tumompa langit dohot tano on.

H     :   Amen.

U     :   Nunga didok Jahowa mandok Tuhanku : Hundul ma Ho di siamunHon, paima hubahen angka musuM sidegedegean ni patMu.

H     :   Marrongoman bangsoM ro sian lomona di ari parporanganMu, marpahean habadiaon; songon nambur sian ampuan ni andos torang ro do tu Ho paranganMu angka na umposo.

U     :   Nunga pola maruari Jahowa, jala ndang tagamon solsolanna rohaNa : Sai Ho do malim ro di salelenglelengna mangihuthon horong ni si Melkisedek. Sai patimbul ma diriM, ale Debata, tu atas ni langit hamuliaonMu tu sandok tano on. Haleluya.

H     :   (mangendehon )  Haleluya, Haleluya, Haleluya

U     :   Martangiang ma hita ! Ale Tuhan Jesus Kristus Anak ni Na tumimbul, naung manaek tu banua ginjang di siamun ni Debata ama !  Sai suru ma Tondi Porbadia tu rohanami be, asa Ibana tongtong mangajari hami, jala patauhon hami gabe sitindangiM di tonga-tonga ni na humaliang hami. Godang na masa na mambahen lomos rohanami. Pargogoi ma hami huriaM na di potibion on asa tongtong marhaporseaon tu Ho.

H     :   Lehon tu hami Parhalado na burju tu hatam, na tongtong mangaradoti ulaonna. Parsahalai ma nasida mangalo bisuk ni sibolis i, asa tung rarat harajaonMu di hasiangan on.

U     :   Sai pamonang ma hami manaluhon dosa dohot hamatean. Urupi ma hami padaohon biar sian roha nami. Papos ma rohanami marhite-hite Tondi Porbadi, paboa  na dongananmu do hami sahat ro di ujung ni hasiangan on. Amen.         — hundul —

3.       Marende BE. 97: ”Patimbul be ma Sangap”

        Ingoton ma sadari on Parnaek ni Tuhan Jesus

        Tu habangsaNa na tongtong  Na so tarbaen be meret

        Tasomba ma Tuhanta i Naung mulak tu Amana i Tapuji ma Ibana

 

        Ai nunga mungkap dalan i Di angka na porsea

        Lao mamongoti surgo i Malua sian jea

        Naung mangonai tu sasude Na mangulahon dosa i Pinuji ma Tuhanta.

4.       REFLEKSI : ”HANANAEK TUHAN JESUS TU BANUA GINJANG”

U     :       Na marlas ni roha do hita nuaeng manghalashon parningotan di Ari Hananaek ni Tuhanta Jesus Kristus tu banua ginjang. Dung salpu haporsuhon na tinaonna i, dipatandaphon do dirina mangolu tu nasida marhite-hite lan tanda, i ma na pinataridahonna dirina tu nasida leleng ni opatpulu ari, dohot manghatahon taringot tu harajaon ni Debata.

H     :       Didok Tuhan Jesus : Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on.

U     :       Jadi dung didok songon i, tarhinsat ma Ibana dipanotnoti nasida :dung i diholipi ombun i ma Ibana sian jolo ni matanasida.

Baoa:    Di na tinuluthon nasida dope Ibana na laho i tu ginjang, nunga jongjong di lambungnasida dua halak parulos na marlinanglinang.

U     :       Angka na mandok : O hamu halak Galilea, aha ma sai jongjong hamu mamerengi dompak ginjang ? Anggo Jesus i, na tarhinsat  sian lambungmuna tu banua ginjang i, na ro do Ibana sogot, songon  na ni idamuna.  Ibana laho dompak banua ginjang.

Br    :   Dung i, mulak ma nasida tu huta Jerusalem sian dolok na margoar dolok Jetun, na jonok tu Jerusalem ; na hadalanan di ari Sabat  do daona.

U     :       Angka i do saluhutna mandatdati martangiang sian sada ni roha nasida, rap dohot angka parompuan dohot si Maria, ina ni Jesus ro di angka anggina i.

H     :       Tung di halomohon Tuhanta do, asa marparange hita songon angka anak hatiuron mangadopi ragam ni na masa di ngolunta on. Ai didok do : Pasomal-somal ma dirim tu hadaulaton.

U     :       Ai otik do guna ni na pabosihon daging ; alai tu saluhutna do hasea hadaulaton i, ai hangoluan nuaeng nang sogot dibagabagahon. Haposan do hata i jala tau situtu jaloon. Ai ala ni i do, umbahen loja hita jala marungkil : ala manghirim hita di Debata na mangolu, Sipalua halak saluhutna, alai sumurung angka na porsea. Antong ita dok ma mauliate tu Debata Ama, siala asi dohot holong ni rohaNa, jala rap ma hita mangido gogo sian Debata laho mangulahon lomo ni roha di ngolunta be.

U+H : Ale Tuhan Debata, sai pargogoi ma hami mangulahon lomo ni roham di portibi on. Amen.

5.       K O O R  :  

6.       Marende BE. 432 “Sian Hurungan ni Dosangki”

      Sian hurungan ni dosangki ro au tu Ho, Ro au tu Ho.

      Tu haluaon di mudarMi Jesus au ro tu Ho

      Nasa rohangku malum, hipas Gabe mamora, nang pe pogos,

      Sian jeangku ro au tu Ho, Jesus au ro tu Ho.

— jongjong —

        Sian ilangku,  nang ramunhi :,:  Ro au tu Ho :,:

        Gabe na ias nang rohangki, Jesus, au ro tu Ho.

        Sian holsongku  tu  sonangMi, sian runduthu tu dameMi,

        Sian arsakku tu holongMi, Jesus, au ro tu Ho.

7.  MANOPOTI DOSA  & BAGABAGA HASESAAN NI DOSA                                             

U     :       Hamu angka dongan sahaporseaon, di Ari Parningotan Hananaek  ni Tuhanta Jesus Kristus sadari on, denggan do molo tapaunduk rohanta laho marningot angka pambahenanta na sailaon. Godang do angka dosa na tabahen : marhitehite pingkiran, pangkhataion dohot marhitehite pambahenanta maradophon Tuhanta Debata dohot  tu donganta jolma. Na manaek do Tuhanta tu harajaonna laho mangondihon hita tu Ama i. Na hundul do Ibana di siamun ni Debata Ama, laho manguhumi halak pardosa. Nasa na porsea di Ibana na mangongkuhon angka dosana dapotan hasesaan ni dosa, jala nasa na porsea di Ibana hona uhum. Alani i, di na jongjong hita nuaeng di adopan ni Debata taboan be ma angka dosanta jala ta pangidoma hasesaan ni dosa sian Ibana.

H     :   Ale Tuhan Parasiroha na sumurung, na jongjong do hami nuaeng di adopanMu na marmulia i manopoti saluhut dosa nami na godang i. Asi ma rohaM di hami, sesa ma dosa nami.

U     :   Hamu Ale angka dongan, songon i ma holong ni roha ni Debata di portibi on – dibagasan anak-Na Tuhan Jesus Kristus, dihophop do sude dosa dohot hajahatonta. Ala i molo tapamanat jala ta sulingkit sude parulaonta, tung jotjot do hita manimbil sian lomo ni roha-Na. Ndang ta haholongi donganta songon dirinta sandiri, sai tongtong dope mian hita di angka ragam ni pangalaho hajahaton. Siala parulanta na so ture, gabe ta panghilalahon do hasusaan dohot lan hapariron di ngolu on.

H     :   O Tuhan, jotjotnai huhalupahon hami panghophoponMi dibagasan ngolu nami. Nuaeng hutopoti hami ma sude angka dosa pangalaosion nami tu adopan-Mu. Ale Tuhan Jesus birubiru ni Debata asi ma roma di hami, sesa ma saluhut dosa nami.

U     : Ale Tuhan! Tung balga do holongMu di hami, ndang tarasam hami marhite sere dohot perak. Nuaeng jongjong ma hami di adopanMu manopoti  sude dosa nami na godang i, asi ma rohaM di hami. Ramun situtu do ngolu nami alani parulan nami na so ture. Songon ama, ina, ianakhon hami di ruma tangga, ndang Ho be hubahen hami ojahan dohot sitiruon – nunga jumotjotan hami marojahan tu gogo, hamaloon dohot pingkiran nami sandiri. Nunga ngolu hasonangan portibi hubahen hami sitiruon nami. Jotjot do hami marminggu, alai ndang mangolu tondi ni parmingguon i di hami. Jotjot do hami martangiang, alai ndang mangolu tondi partangiangon di hami. Jotjot do hami marende partondion, alai ndang mangolu tondi ni ende i di hami. Ale Tuhan, disaluhut angka dosa na hu ulahon hami mangido ma hami tu Ho.

H     :   Mangendehon BE. 171” Tandai Ma Au””

Asi ma rohaM, taringot tu Pangalahongku

Olo Tutu, jotjot do na lilu dalanku

Sesa dosangku sude Debata

U     :   Ale Tuhan! Tung so hagoaran hami do sude angka dosa na hu ulahon hami. Ala i hupatedek hami ma haramunon nami di adopan-Mu. Godang sian tonga-tonga ni ruas-Mu na tumatangis, alani parsorion di ngolu on; godang sian angka ianakhon nami na mandele, ala hinaborat ni mangalului parkarejoan; godang sian tonga-tonga ni ama dohot ina na marungkil, ala na so boi masiantusan di ruma tangga. Tondi na mangahut tu diri dimangmanghon, alai tondi manarihon dongan dihalupahon. Tondi hamongkuson dihalomohon, alai tondi na masileanan di halupahon. Ale Tuhan, disaluhut angka dosa na hu ulahon hami mangido ma hami tu Ho:

H     :   Mangendehon BE. 171” Tandai Ma Au””

Asi ma rohaM, taringot tu Pangalahongku

Olo Tutu, jotjot do na lilu dalanku

Sesa dosangku sude Debata

U     : Tabege ma baga-baga ni Debata taringot tu hasesaan ni dosanta: ai songon on do holong ni roha ni Debata tu portibi on, pola anakNa na sasada i dilehon, asa unang mago ganup na porsea di Ibana, asa hangoluan na saleleng ni lelengna di ibana. Antong haporseai ma naung sesa dosam disesa Jesus. Unang olo i be si bolis di ngolum. Pasangap ma ibana olat ni on ro di saleleng ni lelengna.

H     : Hasangapon ma di debata na di ginjang. Amen

                                   —- hundul —

8.    Marende BE. 177 “Ndada Tarhatahon”

        Ndada tarhatahon hahoholong ni, roha ni Tuhanta di pardosa i.

        Marsak do rohaNa  Mida jolma i, Na so olo unduk di hataNa i.

        Jesus do mandaoni dosa ni sude , Nunga digarari  do utangta be

        Nunga pola mate Tuhan Jesus i, Paluahon hita sian dosa i.

        O hamu pardosa sai tandai ma i,  Lehon di Ibana rohamuna be

        I do pangidoan ni Tuhanta i, Asa sai tong sonang bahenonNa i.

 9.   MANJAHA E P I S T E L : 1RAJARAJA 8:22-28

U     :   Dung i jongjong ma raja Salomo di adopan ni langgatan ni Jahowa mandompakkon sandok luhutan Israel, jala dipaherbang tanganna dompak langit.

H     :   Dung i ninna ma: Ale Jahowa, Debata ni Israel! Ndang adong Debata na tudoshon Ho di banua ginjang dohot di banua tonga on; Ho do tutu pahothon parjanjian dohot asi ni roha tu naposom, angka na marparange di jolom sian nasa rohana.

U     :   Ho do naung pasintongkon tu damang, naposom si Daud i hata na pinorbagabagam tu ibana; pamanganmu tutu marbagabagahon, jala tanganmu pasintongkon apala sadarion.

H     :   On pe, ale Jahowa, Debata ni Israel! Sai pasintong ma tu naposom si Daud, damang i hata naung pinorbagabagam hian tu ibana, uju na nidokmu: Ndang jadi hurangan di ho sada baoa di jolongku na hundul di atas habangsa ni harajaon Israel, asal diramoti angka anakmu dalanna, marparange nasida di jolongku songon ho naung marparange di jolongku.

U     :   On pe, ale Debata ni Israel, sai pasintong ma hatami naung pinorbagabagam tu naposom si Daud, damang i.

H     :   Alai tahe, tung tarbahen Debata ma tutu maringan di atas tano on? Ida ma, gari langit ni langitan ndang hahaliangansa Ho, baliksa apala joro on na hupauli on?

U     :   Alai sai manatap ma Ho tu tangiang ni naposom dohot tu parhurajaonna i, ale Jahowa Debatangku! Sai tangihon ma joujou dohot tangiang na tinangiangkon ni naposom di adopanmon sadarion.

Martua ma na tumangihon hata ni Debata jala na umpeopsa.

H     :   Amen

10. K O O R:

 11. Marende  BE. 273: “Jesus Tuhanku Rajai ma Au”

Jesus Tuhanku rajai ma au on Asa mangihut tu Ho au tongtong

Topot rohangku ingani ma i Unang be masuk na asing tusi

Jesus pasonang rohangku tongtong Asa marguru tu Ho au tongtong

— jongjong —

Na marhaposan tu Jesus tahe Sai na martua ibana muse

Na marsigantung tu Jesus tutu Jala marroha na bonar burju

        Sonang ibana di portbi on Sonang nang sogot di surgo tongon

12. MANGHATINDANGKON HAPORSEAON

U     :   Tahatindangkon  ma   haporseaonta i,   songon  na hinatindangkon ni  donganta sahaporseaon di sandok portibion. Rap ma hita mandok .

H     :   Ahu porsea  …….dst                                                                  ( H u n d u l )

13. K O O R : 

 14. SUNGGUL-SUNGGUL / TANGIANG PANGONDIANON

 15. K O O R:

 16. Marende  BE. 100 : 1 …  “Bongoti Rohangku”      BL. 155

Mardongan olopolop, Manaek Tuhanta i, Jinangkon ni na torop Surusuruan i.

Antong, nang hita pe, Tapuji ma Tuhanta, Marende-ende hita, Marolopolop be.

 Na mulak do Tuhanta Tu habangsaNa i. Tu lambung ni AmaNa Di siamunNa i. Disomba sasude Na di banuaginjang Tuhanta i, na monang Ro sian tano i.

— musik —

Tatimbang ma lapangNa Umbaen na songon i, Ai naeng ma dohot hita Tumopot surgo i. Antong, taingot ma Ianggo Tuhan Jesus, Ibana do patulus Nidok ni Debata.

 Ditaon do hamatean Humophop hita on, Pature pardalanan, Na sian tano on,

Manogu hita be Tu lambung ni AmaNa i, Disi, di adopanNa, Naeng sahat sasude.

— musik —

I pe ringgas ma hita Mangalo dosa i Manggotap roha daging Nang hajahaon pe

Tahalungunhon be Tuhanta na  di ginjang Ibana do na monang I ma tatiru be.

O Jesus Tuhannami Asi ma rohaMi  Sai sesa dosanami Palua hami be.

Pamasuk hami on Tu hangoluan sogot Sai loas hami dohot Mamuji Ho tongtong.

 17.   J A M I T A :  JOHANES 12:32-25

 18. Marende  BE. 99 : 1 …  “O Tondi Parbadia i, Bongoti“    BL. 206

~~ Pelean – II  & Silua Amplop —

O Ulu balang na gogo, Songon sadari on do Ho Manaek tu hasangapon !

Naung sidung do ulaonmi ; Na ringkot patupaon mi, Hu mophop hajolmaon.

Sabam, tongam do Ho muli tu na uli Marhabangsa Di siamun ni Jahowa

Marloksaloksa Serapim, Marriburibu Kerubim Mamuji Ho na monang ;

Dibaen naung pinadomumi Saluhut manisia i Tu Debata di ginjang.

Puji, puji Jesus Kristus, naung patulus, saluhutna Tinonahon ni Amana

~~ O r g e n ~~

O Jesus, Ho do ulu ni Luhutna na porsea i , Ruasmu anggo hami.

Ho hangoluannami on, Ho hasonangannami on, Ho hagogoonnami !

Suru, togu Rohanami, asa hami mangalehon Tu Ho nasa hasangapon

 

Sai taiti rohanami on, Urupi hami on tongtong Mangalo dosanami.

Paias rohanami be, Parangenami baen ture, Nang pangkataionnami.

Tompa roha Na imbaru, asa haru monang hami, Maralohon dosanami  

 

19. PARSURUAN TU NGOLU SIGANUP ARI

Pdt :   Didok Tuhan Jesus Kristus,di na laho manaek tu banua ginjang :“Laho ma hamu tu liat portibion ;  jamitahon hamu ma  barita  na uli i tu nasa na tinompa. Na porsea jala tardidi dapotan haluaon ; alai na so porsea i, hona uhum do “

H     :   Martua ma na pinaburu-buru ni halak ala ni hatigoran, ai di nasida do harajaon banua ginjang i.

Pdt :   Ihut tusi, didok Tuhan i dope tu ganup hita na porsea :“Nasa na binahenmuna tu sada sian anggingku na metmet on, na tu ahu do i dibahen hamu “. Antong, ita surdukhon ma tanganta mangurupi angka donganta na hurangan so marnida bohi. Ai na tu Tuhan i do na tabahen disi. Tapungka ma i tu na jumonok tu hita.

H     :   (mangendehon)  BE. 518 : 1    “Marsinondang Dibaen”                      

            Marsinondang di baen Jesus asi ni rohana i, jala hita do di suru, asa ta paboa i. Tapagalak palintonta, tapatiur dalan i, ai torop do pe na lilu, sai hatop ma mulak i.

 Pdt    :   Mulak ma hamu tumopot bagas dohot ulaon muna be.  Pos ma rohamuna, donganan ni Tuhan Jesus do hamu mangulahon lomo ni roha ni Debata marhite-hite Tondi Parbadia. Mardame ma ho muli.

H   : (mangendehon)  BE. 518 : 4 “Marsinondang Dibaen”                       BL. 355

            Dongan sotung mintop lampu na ringkot tu dongan i,

            sotung mago angka jolma di baen halembaonmi. Tapagalak palintonta,

            tapatiur dalan i, ai torop do pe na lilu, sai hatop ma mulak i.

 

20. Tangiang Panutup: Pelean, Ari Hananaek, Ale Amanami,  Pasupasu.