Acara Ibadah Pesta Gotilon 2

ACARA IBADAH PESTA GOTILON

01. PANGARADEON DIRI

  • Saluhut ruas ni huria mambuat hundulan hombar tu wijk na be.
  • Angka punguan Koor hundul di inganan naung nitontuhon
  • Prosesi Parhalado

— saat teduh —

02. PANGGILAN BERIBADAH:

L    : Huria ni Debata na dihaholongan ni Tuhanta Yesus Kristus, hami saluhut Parhalado, pasahathon tabe ma tu sude hamu ruas ni huria:  Asi ni roha ma di hamu, jala dame na sian Tuhanta,  ima na mangaramoti hita saluhutna.

Dibagasan sadarion tung tama do hita mandok mauliate tu Debata, disaluhut pandonganion dohot pangaramotion ni Debata  di sude pardalan ni ngolunta. Di ari sadarion dipaloas Debata huria-Na, patupahon PESTA GOTILON, manghalashon pasu-pasu dohot denggan basa ni Jahowa dibagasan ngolunta. Saluhutna I tung asi ni roha ni Debata do I tu hita. Ala ni tapuji ma Tuhanta jala tasomba ma Ibana, taendehon ma “Sangap ni Jahowa”

J     : (mangendehon BE 581: “Sangap ni Jahowa”)

Sangap ni Jahowa na sun timbul I, balga ni holongNa ndang tarasam i

Dilehon AnakNa na sasada I, manobus hita jolma pardosa i

Pujima Debata ale manisia, las roham, las roham somba ma Debata

Dapothon Jahowa na sun timbul I, marhite AnakNa Tuhan Jesus i

L    : Tung so tarasam hita do balga ni holong ni roha ni Debata, dibagasan pardalan ni ngolunta, jala tung so hasuhatan do denggan ni basaNa. Antong haholongi ma Debata sian nasa roham, sian nasa ateatem dohot sian nasa pingkiranmu. Robe ma hamu tu adopanNa jala somba ma Ibana.

J     :  (mangendehon BE 581: “Sangap ni Jahowa”)

Tung so hasuhatan do basaNa I, marhite AnakNa ni lehonNa i

MudarNa durus do di hau silang I, rara pe dosanta ias di baen i

Pujima Debata ale manisia, las roham, las roham somba ma Debata

Dapothon Jahowa na sun timbul I, marhite AnakNa Tuhan Jesus i

L    : Pillit ma sadarion, manang na ise do sioloanmu: hagogoon portibion do manang Debata si lehon hangoluan? Pillit ma sadarion manang na ise si sombaonmu: debata sileban do manang Debata sitompa langit dohot tano.

J     : Alai anggo au dohot donganhu sajabu, Debata do sioloan dohot sisombaon nami.

… jongjong …

J     : (mangendehon BE 581: “Sangap ni Jahowa”)

Balga situtu pambaenMi Debata, tung so hasuhatan holong ni rohaM

Tu jolma pardosa asi do rohaM, di ungkap, Ho dalan lao tu banuaM

Pujima Debata ale manisia, las roham, las roham somba ma Debata

Dapothon Jahowa na sun timbul I, marhite AnakNa Tuhan Jesus i

03. VOTUM – INTROITUS – DOA

L    : Marhitehite goar ni Debata Ama dohot goar ni AnakNa Tuhan Yesus Kristus dohot Goar ni Tondi Parbadia na manompa langit dohot Tano on.

J     :  Amen.

L    : Songon on do didok Tuhan Jahowa: Ndang be ulahanKu mangaragehon nasa na mangolu, songon na hubahen i.

J     :  On pe saleleng adong tano on, ndang jadi mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin.

L    :  Na balga situtu do Ho, ale Jahowa Debatangku, marpahean hasangapon dohot hamuliaon do Ho. Haleluya.

J     : (mangendehon: Haleluya-Haleluya-Haleluya)

L    : Martangiang ma hita: Ale Tuhan Debata, Amanami na di banua ginjang ! Ho do haroroan ni sude denggan basa na marragamragam i. Alani pasupasuM do umbahen marparbue sude na niula ni tangannami, jala diparmudu Ho do hami na tinompaM, asa unang rapar. Dibahen I marpungu hami nuaeng mandok mauliate sian nasa rohanami tu Ho. Sian tanganMu do sude hujalo hami, nasa na denggan  tu dagingnami dohot tu tondinami, jala asi ni rohaM do na mangaramoti hami. On pe sai jalo ma hamauliateon ni rohanami. Angkup ni I sai lehon ma TondiM tu hami, na mamuhai dohot patiurhon matani rohanami, asa lam huida hami sude na denggan, sude na uli na pinatongonMi tu hami, sa lam ringgas rohanami mamuji dohot pasangaphon Ho marhitehite Tuhan Jesus Krsitus, Tuhannami. Amen.

— hundul —

04. Marende BE No 373 : “Mangula Hita Jolma”

Mangula hita jolma Manabur boni I, Alai anggo jadina Di Debata do i

Dilehon las ni ari Nang nambur udan pe, Tongtong di panumpakNa

Marguru sasude Nasa ulibasa ro sian Debata, I pe Ibana puji ma Huhut haposi da.

Sai sian Debatanta Do nasa na adong, Nang rihit sangkamata

Nang laut,nang tano on Tinompa ni hataNa Do hau nang bulung i

Nang nasa parbuena Nang bungabunga i ,Nasa uli basa…du.

05. MANJAHA PATIK: “MANGHAMAULIATEHON DENGGAN BASA NI JAHOWA”

L    : Hamu ruas ni huria na nihaholongan ni Tuhanta Jesus Kristus! Di las ni rohanta na mar-PESTA GOTILON hurianta sadarion, tama do auhononta hata ni Debata na mandok:  Saluhutna silehonlehon na denggan, nasa ulibasa na mauliutus, ima na ro sian ginjang. Dilehon do di hita parbueni tano, parbueni suansuanan dohot parbueni angka ulaonta. Saluhutna i nunga tajalo sian Jahowa. Antong ndatama ma hita mandok maulite tu Debata?

J     :  Mauliate ma di Ho Tuhan, naung mangalehon parbue ni angka ulaonnami.

L    :  Didok hata ni Debata: Ingkon buatonmu ma sian patumonaan ni sandok parbue ni tano i, na dapot ho sian tanomi, naung nilehon ni Jahowa, Debatam tu ho, jala pamasuhonmu do i tu bagasan ampang, jala boanonmu do i tu inganan sipilliton ni Jahowa, Debatam bahen inganan di Goarna. Ingkon burju do lehononmu parpuluan sian nasa gogo ni tano, boni sinaburhonmi, sian saluhut na tubu di tanomi ganup taon.

J     :  Mauliate ma di Ho Tuhan, naung mangalehon parbue ni angka ulaonnami. Hupasahat hami ma i bahen pelean na hushus di joloM.

L    :  Antong! Taruhon hamu ma sintong parsampuluan i tu bagas parpeopan, asa adong bohal di bagasan jabungku, jala unjuni hamu ahu taringot tusi, ninna Jahowa Zebaot, manang so ungkaponku di hamu angka pandiloan ni langit, jala mangusehon tu hamu gabe maradu marlobilobi.

J     :  Mauliate ma di Ho Tuhan, naung mangalehon parbue ni angka ulaonnami. Hupasahat hami ma i bahen pelean na hushus di joloM.

L    :  Alai marhuaso do Debata, mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan. Antong rap mangido gogo ma hita tu adopan ni Debata.

J     : Ale Tuhan Debata sai pargogo I ma hami, mangulahon na hombar tu patikmi. Amin.

06. K O O R :

07. Marende BE.No. 164 “O Tuhan Jesus Ho Rajangku”

O Tuhan Jesus Ho Rajangku Tangihon au naposoMon

Naeng topotanku do dosangku Tu Ho Sigomgom tano on

Ai naeng mangolu tondingki Marhitehite mudarMi.

— jongjong  —

Godang do dosa ni tanganku Rohangku pe gok dosa do

Nang mata pe nang pamatangku Luhutna i gok dosa do

Sai sesa nasa dosangki Marhitehite mudarMi.

08. PANOPOTION NI DOSA DOHOT HASESAAN NI DOSA

L    : Huria ni Debata na nihaholongan ni Kristus. Dibagasan unduk dohot serep ni roha, ro ma hita tu adopan ni Debata. Tatopoti ma dosanta tu Amanta Debata, jala tapangido ma hasesaan ni dosanta, dibagasan goar ni Tuhan Jesus Kristus Parasi roha i. Martangiang ma hita: … Ale Debata amanami na badia jala na gok asi ni roha, manang na piga hali hami ro tu adopanMu, huparhatopot hami do sude angka dosa nami na godang i. Tung mansai jotjot do hami manirpang sian dalanMu, ndang mangulahon lomo ni roham. Nuaeng ro hami tu joloM mangido asi ni rohaM:

J     :  Sai sesa ma sude dosa nami jala unang paingot-ingot sude dosa nami na godang i.

L    : Unang ma pabali hami sian adopanMu ale Jahowa, ala ni dosa dohot hajahaton nami. Alai marpamuati ma rohaM di hami. Tung mansai susa do parngoluonnami apala di tingki na parpudion : Masa na habanjiran mambahen godang sian tonga-tonga nami di bangso on tarlumobi ma dongannami na di Wasior Papua na hapusohan, agoan arta, jala marungkil,. Manghutur tano hinorhon ni lalo…jala mapultak dolok,… mambahen dongan nami na di Mentawai dohot na di Yogyakarta tumatangis…, agoan hosa…, agoan bagas parlinggoman…, jala digohi biar. Godang sian tonga-tonga nasida na ingkon maninggalhon hutana…, natoras marsirang sian ianakhonna.., male ala maol jumpang sipanganon…, ngalian ala ndang adong ulos siparuloson… mabugang ala ndang adong ubat sipangkeon. Ale Tuhan… unang ma laluhon rimasMu tu hami, ai ndang manahan hami. Ale Tuhan…hupaunduk hami ma nuaeng simajujung nami tu Ho, jala huparhatopot hami ma nuaeng di adopanMu, jotjot do hami lilu songon biru-biru masitondong dalanna be. Ndang be hu ulahon hami lomo ni rohaM. Asi ma roham di hami ale Debata, asi ma rohaM mida sandok bangsonami on. Sai, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, sipangoluhami.

J     : (Ende Koor “Naung Gumalunsang”)

Nang gumalunsang angka laut, nang ro pe halisungsung i,

Lao mangharomhon solungki.

Hot do Tuhan parhata saut, mandok hataNa ingkon saut

Sai saut doi, sai saut do i, sai saut do i.

Reff. Ndang be mabiar au disi, mangalugahon solungki

Ai Tuhanku do donganki.

Ai tung godang pe musungki, na mangarongom ngolungki,

Sai dao do i, sai dao do i, sian lambungkii

Hatop marlojong do solungku, tu labuan hasonangan

Na so adong be dapat hasusaan i, tudos tu si do pardalananki

Ditogu Jesus au tusi.

Sipata naeng lonong do au, so halugaan galumbang i

Tung ise ma haporusanki i, ingkon hutiop tongtong Jesus i

—musik—(mulak tu reff—)

Ingkon hutiop tongtong Jesus i

L    : Huria ni Debata naung manopoti dosa, nuaeng tabege ma hata baga-baga ni Debata, taringot tu hasesaan ni dosanta: Songon on do hata ni Tuhan Jahowa: Ai munsat pe angka dolok, jala humuntal angka robean, alai anggo asiasingku na so tupa munsat sian ho, jala padan ni hadameonku na so tupa humordit, ninna Jahowa siasii ho. Hasangapon ma di Debata na diginjang.

J     : Amin. … hundul…

09. Marende, BE No. 467 “ Asi ni RohaM Hupuji”

Asi ni rohaM hupu ji ala Ho manobus au.

Di paias Ho rohangku, ga-be soranganMu Au.

IngananMu rohanami. TondiMi manggohi i.

Pangke dohot ngolunami gabe ulaulaMi.

10. MANJAHA EPISTEL: 2 TIMOTEUS 2:1-7

L    : Turpuk Epistel di Minggunta sadarion, ima na tarsurat di 2 Timoteus 2:1-7 songon on ma didok disi: Onpe, ale anaha, margogo ma ho marhitehite asi ni roha ni Kristus Jesus!

J     :  Jadi ma binegem sian ahu di adopan ni torop sitindangi, i ma pasahat tu halak haposan, angka na tau mangajari na asing.

L    :  Gabe dongan manaon haporsuhon ma ho, songon parangan na denggan di Kristus Jesus!

J     :  Ndang olo alit parporang tu angka ulaon pandaraman, asa halomoan ibana di na marsuru ibana.

L    :  Nang na marsiadu pe, ndang dipartumpali, ia so tigor paraloonna i.

J     :  Ingkon siula hauma i jumolo taruli di parbuena!

L    :  Antusi na hudok i; ai lehonon ni Tuhan i do tu ho roha mangarti saluhutna i.

Ido sahatna. Martua ma halak na tumangihon hata ni Debata jala na umpeopsa.

J     :    Amin

11. KOOR:

12. Marende BE.No. 758 “Jahowa Pangurupi”

Jahowa pangurupi disi ulaonmi, Dilehon pos ni roha di ganup tingki I,

Nangpe sipata ganggu haporseaonmi,

Jamot tongtong Tuhanmu manjaga ngolumi.

—jongjong—

Jahowa pandongani di na porsea I, Ibana patuduhon nang sidalananmi

Asa marolop-olop ho di ujungna I,

Ibana do donganmu nuaeng nang sogot i.

13. MANGHATINDANGKON HAPORSEAON

L    : Hamu angka dongan ! Rap dohot angka donganta sahaporseaon di sandok portibion, tahatindangkon ma hata haporseaonta I, rap ma hita mandok:

J     : Ahu porsea … dst. — hundul —

14. KOOR:

15. TINGTING + TANGIANG PANGONDIANON.

16. KOOR:

17. Marende BE.No. 755 “Haposan Ho Tuhan”

Haposan Ho Tuhan hot do holongMu, Di las ni roha tingki arsak pe

Asi ni rohaMi nang pambaenanMu , Ho Sipalua pangondingan pe.

Haposan Ho Tuhan haposan Ho Tuhan, Ndang na mansohot asi ni rohaM

Nasa na ringkot di au di parade, Tung ala ni asiM do I sude.

Logo ni ari nang rondo ni ari, Nang tano laut bulan bintang I

Sude tinompaMi manghatindangkon, Denggan ni basaMi di hami on.

Haposan Ho Tuhan … du.

— music —

Di rade Ho do dame na manongtong, Di togu Ho do au di dalanki

Marlas ni roha au marpanghirimon, Jala margogo ala basaMi

Haposan Ho Tuhan … du.

18. JAMITA : HESEKIEL 33:12-19+30-33

19. Marende, BE. N0. 470“Jesus Ho Nampuna Au” (—Pelean—)

Jesus Ho nampuna au dohot na adong di au,

Gogo dohot hosangki sahat ma tu tanganMi,

Dohot tanganki tahe, naeng manjama na ture,

Dohot pat sai naeng tongtong, mandalani dalanMon

— musik —

Hata nang soarangki, sai rajai ma dohot I,

Sai denggan huhut sintong, baen hatangku sai tongtong,

Sere, arta, hepeng pe, buat ma di Ho sude;

Tondi nang pamatangki, ingkon Ho oloan ni i

— musik —

Pinangido ma tu Ho, rohangki pe dohot ho,

BahenonMu, Tuhanki, tong tu harajaonMi

Na dihirim rohangki, dohot haholonganki,

Sai tu Ho ma sahat I, sai na sonang I disi

20. PASAHATHON PERSEMBAHAN SYUKUR PESTA GOTILON

Dung simpul dipasahat pelean II, ro ma ruas pasahathon

Persembahan syukur Pesta Gotilon dibagas Amplop.

Ditaruhon jala dipasahat ma i tu jolo tu inganan naung nitontuhon—

J     : Marende BE No 373 : “Mangula Hita Jolma”

Mangula hita jolma Manabur boni I, Alai anggo jadina Di Debata do i

Dilehon las ni ari Nang nambur udan pe,

Tongtong di panumpakNa, marguru sasude

Nasa ulibasa ro sian Debata, I pe Ibana puji ma Huhut haposi da.

Sai sian Debatanta Do nasa na adong, Nang rihit sangkamata

Nang laut,nang tano on. Tinompa ni hataNa Do hau nang bulung i

Nang nasa parbuena Nang bungabunga i ,

Nasa uli basa,..d.u.

Ibana jumadihon panondang sasude, Ibana do manjouhon alogo ombun pe

Na tau palas rohanta, hipas dagingta I,

Tongtong rade bohalta dibaen Tuhanta i

Nasa uli basa…d.u

21.  TANGIANG PANUTUP: PELEAN – ALE AMANAMI – PASUPASU

==================================================================

ACARA NA PASAHATHON PELEAN HODONG

01. Marende BE No. 706 “Godang Ni Pasu-pasu I”

Godang ni pasu-pasu I di lehon Tuhanki, Tarlobi asi-asiMi marhite anakMi.

Jaloma pujianki, Jesus Sipalua I, Boi au bongot tu surgo I,

Marnida hasangaponMi.

Ndang dung mansohot basaMi saleleng ngolungki,

Ho ma tongtong pujionki sangap digoarMi

Jalo ma pujionki … du.

P   :   Mandok mauliate ma hita tu Tuhan I, ai pardengganbasa do Ibana jala ro disaleleng ni leleng do asi ni rohaNa. Dibagasan las ni rohanta sadarion marhite Pesta Gotilon na pinatupa ni hurianta, dalanta do I laho mangokuhon, ia saluhut silehonlehon na denggan jala na maulitus na ro sian ginjang. Antong ro be ma hita tu joloNa… tapasahat ma parbue ni na taula, jala tadok ma:

J     :  NASA NA NILEHONMI, TONDI RO DI PAMATANGKU. HOSA DOHOT GOGONGKI, RO DI SALUHUT ARTANGKU. HUPASAHAT I TU HO, NA SO UNSATONKU DO.

PASAHAT HODONG: (Panitia)

Panitia:

Hamu Amanami Inanami ruas ni huria na sian wijk/koor… Nuaeng pabotohon hamu ma sipasahaton muna di tingkion… hami nunga rade manjalo haroro muna.

Wijk/Koor/Kategorial:

Na ro do hami sian…, las rohanami di Pesta Gotilon ni hurianta sadarion, jala di las ni rohanami I, naeng pasahaton nami ma parbue ni hamauliateon nami tu Tuhan i. Antong parmusik nami: Bahen damang ma jolo Ende pujipujian I asa hupasahat hami hodong nami……

NA PASAHATHON HODONG                         : ENDE

1.      PARHALADO                          :  Somba ma Jahowa (BE. 585)

2.      GURU SEKOLAH MINGGU   :  Dison Adong Huboan (BE.848)

3.      WIJK 1                       : Hupasahat ma tu Jesus (BE.691)

4.      WIJK 3                    :  Hibul Rohangku (BE.690)

5.      WIK 2               :  Marolopolop Tondingki (BE.435)

6.      WIJK 4               :  Molo Ho do Huihuthon (BE.697)

7.      KOOR NHKBP         :  Somba ma Jahowa (BE.585)

8.      KOOR AMA                :  Gok Las ni Roha do Au (BE.754)

9.      MANNEN KOOR            :  Marolopolop Tondingki (BE.435)

10.  INA HANNA    :  Sada Goar na Ummuli (BE.453)

11.  KOOR INA              :  Didalani Jesus Tano (BE.512)

12.  AMA LANSIA    : Somba Ma Jahowa (BE.585)

ACARA MAKAN BERSAMA

About these ads
Ikuti

Get every new post delivered to your Inbox.

Bergabunglah dengan 2.697 pengikut lainnya.

%d bloggers like this: