ACARA PARMINGGUON HASASAOR TONDI PARBADIA

01. Marende BE.  102 : “ O Tondi Parbadia i, bongoti “

O Tondi  Parbadia i, Bongoti rohanami be, Ro, Sipatiur roha !

O  Sondang sian surgo i, Sondangi rohanami be, Tuhalalas ni roha !

Asa masa Patupahon pinodahon ni hatamu. Sai tu hami ma rohaMu

~ ~ ~  jongjong ~ ~ ~

Ho do silehon roha i Di nasa na porsea i. Tumpahi rohanami !

Patogu rohanami be, Pasar hataM tu sasude, Sai tong dongani hami.

On pe sude Parrohaon, hatuaon lehononMu, Sipujion do goarMu !

02.   VOTUM  – INTROITUS – TANGIANG

U   : Marhite-hite goar ni Debata Ama, Anakna Tuhan Yesus Kristus dohot Tondi Parbadia na tumompa langit dohot tano on.

R   : Amen

U   : Songon on ninna Tuhan Jahowa: LehononKu tu hamu roha na imbaru dohot tondi na imbaru tu bagasan ateatemuna, jala unsatonKu do roha batu sian dagingmuna, jala lehononKu tu hamu roha na marpangkilalaan.

R   : Jala lehononKu ma TondingKu tu bagasan ateatemuna, Ahu do mambahensa, asa marparange hamu di bagasan angka PatikHu, angka uhumHu pe radotanmuna jala patupaonmuna do.

U   : Dihamu do baga-baga i dohot  di angka anakhonmuna, ro di saluhut na dao, manang piga na naeng jouon di Tuhanta dope. Haleluya.

R    : (mangendehon)   Haleluya, Haleluya, Haleluya

U   : Martangiang ma hita ! Ale Tuhan Debata, Amanami ! Ho do manondangi jala mangajari roha  ni angka na porsea di Hatam marhite-hite Tondi Porbadia. Sai buhai ma rohanami marhite-hite TondiMi, asa tongtong gok dame rohanami, manghalashon hagogoonNa i marhitehite Tuhan Yesus Kristus Tuhannami. Amin.

— H u n d u l –

03. Marende BE 462 “Ale Tondi Parbadia”

Ale Tondi Porbadia, sai songgopi hami on.

Rohanami ma paria lao mamuji Ho tongtong.

Ho tongtong, Ho tongtong, lao mamuji Ho tongtong.

ApiMi sai lam pagalak, sondang di na holom i.

Asa las, tiur ma halak. Lam pita huriaMi.

Lam pita, lam pita, lam pita huriaMi.

04. PANGARATAION DI KONFESSI HKBP TARINGOT TU TONDI PORBADIA DOHOT HURIA  (BINDU 3 C DOHOT  8 A)

U   :    Hamu angka dongan sahaporseaon, itaparata ma jolo parningotanta di Konfessi ni hurianta HKBP taringot tu Tondi Porbadia dohot  ruhut-ruhut parhuriaon di HKBP, asa unang lipe pangantusionta, alai asa lam dasip ngolu parhuriaonta di HKBP anggiat marsangap goar ni Tuhanta marhite panghatindanghononta nang pangalahonta maradophon Debata Jahowa.

a. Tondi Porbadia

Tahaporseai jala tahatindanghon do: Debata Tondi Porbadia do na manjou, mangajari huria i jala patongtonghon di bagasan haporseaon dohot habadiaon di bagasan Barita Nauli bahen hasangaponni Debata. Marhite on taalo jala tatulak do poda na mandok :

R   : Boi do songgop Tondi Porbadia tu jolma marhitehite panghobasion nasida sandiri so pola marhitehite sian Barita Nauli”.

U   : Laos songon i ta alo jala ta tulak do poda na mandok : “Holan marhitehite na siarsiaran dohot na marhata sileban do songgop Tondi Porbadia”.

R   : Laos songon i ta tulak jala ta alo do poda na mandok :  Na so pola ringkot marubat, sae do molo holan martangiang tu Tondi Porbadia. Jala na mambahen panurirangon gapgap mangasahon Tondi Porbadia.

U   : Laos songon i parsaoran na masalpuhu, na matorbanghu, ala naung digohi Tondi Porbadia, ninna. Sudena na ta alo jala tatulak on, i ma angka poda na mangasahon Goar ni Tondi Porbadia di na so ture dalanna. Marhite pangajarion ni Tondi Porbadia, tahatindanghon do:

b. H u r i a

Ima parpunguan ni angka na porsea di Jesus Kristus, na jinou, na pinapungupungu, na pinorbadiaan jala na pinatongtong ni Debata marhitehite Tondi Porbadia. Alani taalo jala tatulak do :

R   : Huria (sada punguan) na pinajongjong ni jolma sian lomona sandiri, ima na papulik dirina sian hurianta, so alani naung masa di hurianta poda na maralo tu Hata ni Debata.

U   : Dohot pingkiran na mandok:”Holan huaso ni angka partogi, angka rapot-rapot dohot hak ni ruas do na manggomgomi huria; ai holan Kristus do na marhuaso di huria jala holan aturan na hombar tu hataNa do siturutan. Ndang demokrasi na mangarajai huria, alai Kristokrasi do.

R   : Pingkiran na mandok : Asa “Huria Negara” Hurianta on. Ai asing do kewajiban  ni negara sian tohonan ni huria. Nang dohot pingkiran na mandok: Punguan na marondoloan dohot na tarihot tu paradaton do Huria i dohot pingkiran na lipe na manghirim ngolu ni Huria ala ni organisasi sambing.

U   :    Ale Tuhan Debata, sai pargogoi ma hami mangulahon nasa na denggan, jala dongani ma hami maralohon nasa jat.

R   : Amen.

05. K O O R  :

06.   Marende BE. 109 “Jesús Hami Ro Dison”

Sai songgopi hami on Ale Tondi Parbadia

Sai ajari ma tongtong Hami on huhut paria

Martangiang tu  Tuhanta  Asa tongtong oloanNa.

— jongjong —

Tondi hasangapon i  Sai ingani rohanami.

Pargogoi ma hami be Maralohon dosanami

Asa  tung malua hami Sian hadosaonnami.

07.   MANOPOTI  DOSA & BAGABAGA HASESAAN NI DOSA

U   :    Hita ruas ni Tuhanta. Na jongjong do hita nuaeng di jolo ni Debata na umboto saluhut. Antong, tapatedekma tu adopanNa nasa pangalaosionta di patikNa. Tatopoti ma nasa dosanta. :  Martangiang ma hita! Ale Tuhan Debata Amanami Jesus Kristus Tuhannami. Huparhatopot hami ma saluhut pangalaosionnami tu Ho. Mansai jotjot huarsahi hami Ho marhitehite pingkiran dohot hata dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami, nang dongannami ndang doshon dirinami hubahen hami.

— hohom/organ BE.171 “Tandai Ma Au —

U   :    Nunga mardosa hami dompak Ho, ale Tuhan. Ai holan di tingki lomo do rohanami huulahon hami na denggan tu dongannami. Jotjot do hami manirpang sian patikMu, sipata holan hagiot pardagingon do hupasarisari hami. Jotjot hami ndang parduli di hataM, gabe sai humasusa hami pasarisari na ringkot di ngolunami. Lupa hami mangalualu tu Ho. Ale Tuhan, asi ma rohaM, marpamuati ma RohaM mida dosanami i. Asi ma roham di hami. Sesa ma dosanami.

R     :           (Mangendehon) BE 171 :  ”Tandai Ma Au”

Tandai ma au! Sungkapi ma dohot rohangku

Uji ma au, pamanat huhut ma dalanku, olo di tanda Ho au Debata!

U   :    Na maporus ma hami nuaeng tu asi ni rohaM na godang i, mangido sian nasa rohanami hasesaan ni dosanami saluhutna. Sai urupi ma hami paubahon rohanami asa imbaru parange dohot parulan nami saleleng di tano on do pe hami. Tung marungkil situtu do ngolunami ditingkion ala ni dosa na huulahon hami. Masa parmusuon na marluat di bangso nami on hinorhon ni naso masiantusan; masa angka bencana alam banjir, lalo, dohot angka tano na marobung, hinorhon ni tangan na marlomolomo mangahut paruntungan. Lupa do hami manjaga haulion ni jadijadion ni tanganMu. Ale Tuhan, asi ma rohaM, marpamuati ma RohaM mida dosanami i. Asi ma roham di hami. Sesa ma dosanami.

— hohom/organ BE.171 “Tandai Ma Au —

U   :    Ale Tuhan! Nuaeng huanggukhon hami ma saluhut dosanami di adopanMu. Tatap ma hami na marsitaonon, ala ni ulaon nami na so ture. Godang sian tongatoga ni ruasmu na marungkil, ala ni ngolu parianakhonon. Godang sian tongatonga ni ianakhon ni huriaM na mandele, ala ni borat ni mangulului karejo. Godang sian tongatonga ni natoras na mandele, marungkil mamingkiri hinaborat ni biaya parsikkolaan na lam tu timbona. Sipata Loja do hami mangalului parsalian alai ndang jumpang, hudioari hami ulaon tu dolok tu toruan, alai ndang tuk paulak hosa Loja. Pola do sipata… ndang boi tarpodom hami dipodoman nami mamingkiri angka na porlu dibagasan ngolu on. Ale Tuhan, asi ma rohaM, marpamuati ma RohaM mida dosanami i. Asi ma roham di hami. Sesa ma dosanami.

R  : (Mangendehon) BE. 171 :  ”Tandai Ma Au”

Asi ma roham, Taringot tu pangalahonku, Olo, tutu,

Jotjot do na lilu dalanku, sesa dosangku sude, Debata!

U   : Bagabaga ni Debata taringot tu hasesaan ni dosanta. Molo tung adong manang ise na mardosa adong do pangondionta di Ama i, ima Tuhan Jesus Kristus na tigor roha i. Ibana do pardengganan taringot tu dosanta, alai ndada holan taringot tu dosanta dohot do taringot tu dosa ni saluhut portibi on.

Sude: Hasangapon ma Debata na di ginjang. Amen!

08.   Marende BE. 640 : 1 – 2   “ Haholongon Sian Ginjang“

Haholongan sian ginjang las ni roha na hot I

Tumpal ni asi ni roha sai bongoti rohangki,

Jesus na gok asi roha dohot haholongon I

Baen malua baen martua hami natahutan i.

Lehon tondi haholongon tu parroha na bojok

Baga-baga hadameon sahat baen tu hami on

Jesus Alpha nang Omega bona ni haporseaon

Sai padao ma angka dosa, sai palua hami on.

09. MANJAHA  E P I S T E L  :  HEBER 8:8-13

U   : Ai dihata do nasida, di na nidokna i: “Na ro ma angka ari, ninna Tuhan i, pajongjongonku ma disi padan na imbaru tu pinompar ni Israel dohot Juda!”

H   : Ndada suman tu padan na hupajongjong di angka amanasida, manogihon nasida ruar sian tano Misir; ai so mian nasida di bagasan parpadananki; nang Ahu pe, ndang hupasarisari nasida, ninna Tuhan i.”

U   : Ai on do padan na naeng pajongjongonku tu pinompar ni Israel, dung salpu angka ari i, ninna Tuhan i: Lehononku do angka patikku tu bagasan rohanasida jala tu ateatenasida surathononku i; dung i gabe Debatanasida ma Ahu, jala nasida gabe bangsongku.

H   : ala ndang pola be diajari halak donganna sabangso manang hahaanggina pe, mandok: Tanda ma Tuhan i! Ai tandaonnasida luhutna do Ahu, angka na metmet nang angka na magodang pe.”

U   : Ai marpamuati do rohangku mida hageduhonnasida, jala na so tupa be ingotonku angka dosanasida.”

H   : Di na tinaringotanna na imbaru i, dipaburukburuk ma na jumolo i. Alai na laho salpu ma nasa naung gabe buruk jala matua.

U   :    Martua ma halak na tumangihon hata ni Debata jala na umpeopsa.

H   : Amin

10. K O O R

11. Marende BE.  106 “Ale Tuhan Amanami”

Ale Tuhan  Amanami Na marholongroha  i.

Suru TondiMi tu hami Angka na tinoguMi

Paimbaru tondingki Gabe joroMi ma i.

Sai oloi pangidoanku Sian asi ni rohaMu.

— jongjong —

Ndang adong hangoluanku Anggo so ro TondiMi

Maringanan di rohangku Jala ndang margogo i.

Patupahon hataMi Pasangaphon goarMi

Sai tongtong holom rohangku Molo  so patiuronMu.

12.   MANGHATINDANGKON HAPORSEAON

U  : Tahatindangkon ma haporseaonta i, songon na hinatindangkon ni donganta sahaporseaon di sandok portibion. Rap ma hita manghatindangkon

H   : Ahu porsea ……. — H u n d u l –

13. K O O R  :

14. T I N G T I N G / TANGIANG

15. K O O R :

16. Marende BE. 107 : 1…  “O Tondi Parbadia i, Sai Masuk“ (Pelean)

O Tondi Parbadia i, Sai masuk Ho tu rohangki !

Pasaorhon asi ni rohaM, Ro di sude denggan basaM

Tu au marhite sondangMi, Nang pe tu jolma sasude

Ai naeng papungu on mu pe Tu Tuhan Jesus jolma sude,

Haleluya, Haleluya !

O Sondang na badia i, Pasaor HataM tu rohangki !

Tiur ma baen rohangkinon, Mananda Debata tongtong.

Padao ma haliluon i, Sinabur ni sibolis i ;

Hubaen ma Tuhan Jesus i Sambing gurungku, ihutanki,

Haleluya, Haleluya !

~ ~ ~  O r g e n   ~ ~ ~

Pangapul ma sumurung i ! Tarapul bahen rohangki,

Manaon na porsuk sai tongtong Saleleng au di tano on,

Humophop goarMi tahe, Sai pargogoi ma au muse

Mangalo angka musungki ;  Ai naeng au bongot tu surgo i.

Haleluya, Haleluya

17. J A M I T A :  JOEL 3:1-5

18. Marende BE. 108 : 1 – 3    “ Hata ni Jahowa “   (Pelean)

Baen ma gaba-gaba, Dohot bunga-bunga Nang pelean i

Ai nuaeng ma jumpang Ari parningotan, Pentakoste i ;

Haroroni Tondi do, Ima Tondi Parbadia, Masuk tu huria

Jangkon ma Ibana, Ai asi rohaNa Ro tu hita on.

Asa sondangonNa, Tiur bahenonNa Parrohaon tongtong

Jangkon ma Ibana da, Asa lao sude arsakmu, Nang pardangolanmu

— musik—

Tondi pangapuli, Sahap na umuli  Di sisean ni Tuhan Jesus Kristus,

Ro ma Ho, pabulus Tongtong langkangki.

Di nalao tu surgo au, Pargogoi ma au, pamonang Sahat tu na sonang

19.   PARSURUAN TU NGOLU SIGANUP ARI

P   : Sadarion, di na tahalashon Hasasaor ni Tondi Porbadia tu angka na porsea di Tuhan Yesus Kristus, dipaingot do hita asa unang olo hita  ela-elaan ni hagiot ni portibion. Ai naeng sirangon ni ido hita sian haluaon binoan ni Tuhanta. Tagogo  ma martangiang huhut tumangihon hata ni Debata ganup ari.

R   : (Mangendehon BE. 461“Songgop Tu Hami“ )

Songgop tu hami na di joloMon, o Tondi ni Debatangki.

Uhir patikMu tu rohangkinon o Tondi ni Debatangki,

Bereng sihol hu di haroroMi, molo ho ro nda hisar tondingki,

Didihon ma tu au on apiMi, o Tondi ni Debatangki.

P   : Gabe lam hisar mahaporseaon, ido dipangido Apostel Paulus sian angka ruas ni Huria naung manjangkon Yesus Kristus Tuhan jala sipalua. Itaulahon ma na denggan tu saluhut halak asa marsangap goar ni Tuhanta marhite pambahenanta.

R   : (Mangendehon BE. 461 :   “Songgop Tu Hami“)              

Suru TondiM paluahon au on. Palua ma, o Debata.

Bereng dagingku, tondingku dison, palua ma, o Debata..

Dao ma pangambat di soaraMi, hisap ni daging, sandok diringki,

Na mangarsahi tongtong TondiMi. Palua ma, o Debata.

P   : Tondi Porbadia ido na patauhon hita mangulahon nasa ulaon na denggan. Jalo hita ma Tondi Porbadia i sian Yesus Kristus Tuhanta i, asa margogo hita patulushon ulaon marbarita na uli di ingananta be. Mulak ma hita mandapothon ulaonta dohot ingananta be. Ingot hamu ma : donganan ni Tuhanta do hita ganup ari rasirasa ro ajal ni hasiangan on.

R   : (Marende BE. 461 :    “Songgop Tu Hami“)

Lehon hataM, I  ma tau podangki, Debatangki na gogo I,

Asa sai talu sude musuMi. Debatangki na gogo i.

Mangkatindangkon tongtong goarMi, asa malua pardosa disi,

Asa dijangkon Tuhanta ma i. Debatangki na gogo i.

20. TANGIANG PELEAN – TANGIANG HASASAOR NI TONDI PORBADIA TANGIANG ALE AMANAMI  – PASU-PASU

— Selamat Ari  Minggu Pentakosta —

About these ads

2 Tanggapan so far

  1. 1

    Mauliate godang amang panditanami dipangaradeon muna di angka acara, na boi pangkeon ni angka dongan sahaporseaon.
    Tabe ma sian ahu : Espana H. Pasaribu |(Administrasi HKBP Ressort Bandung Timur) Phon : 022-7104690


Comment RSS

Komentar ditutup.

Ikuti

Get every new post delivered to your Inbox.

Bergabunglah dengan 2.790 pengikut lainnya.

%d blogger menyukai ini: