ACARA NATAL 25 DESEMBER 2009

(Catatan:  Borhat ma sude Parhalado sian Bilut Parhobasan-Konsistori-dung jolo martangiang. Jongjong sude di altar pasahathon hata “Selamat Ari Natal” tu sude ruas ni huria niuluhon ni Paragenda )

01. SALAM DOHOT JOUJOU TU PESTA HATUTUBU NI TUHAN JESUS

P1  :  Sadari on 25 Desember 2009, i ma puncak ni sude las ni rohanta mamestahon Parningotan Hatutubu ni Tuhanta Jesus Kristus. Marpungu do sude angka naporsea manghamauliateohon balga ni asi ni roha ni Debata na manongos Anakna na sasada i gabe haluaon ni sandok manisia. Antong sian hami Parhalado Partohonan hupasahat hami ma Selamat Ari Pesta Natal tu hamu saluhutna:

Phl :  Selamat Ari Natal ma di hamu saluhutna! Didongani asi ni roha ni Tuhanta Jesus Kristus, dohot holong ni roha ni Debata Amanta dohot parsaoran ni Tondi Parbadia ma hamu, ari on ro di saleleng ni lelengna!”

H    :  Selamat Ari Natal ma nang di hamu angka amanami dohot inanami Parhalado Partohonan di huria on. Asi ni roha ni Tuhanta Jesus Kristus dohot holong ni roha ni Debata Amanta dohot Parsaoran ni Tondi Parbadia  ma nang mandongani hamu saluhutna!”

P2  :  Mangasahon Ari Nauli ari Parningotan Hatutubu ni Tuhan Jesus Kristus sadari on, marsihorasan jala marsijalangan ma hita dibagasan dame dohot las ni roha.

H    :  (Hehe, jongjong marsijalangan ma sude ruas ni huria, laos hundul ma nang angka parhalado marsitopot angka ingananna be!).

SL   :  (Mangendehon) “We wish you a Merry Christmas!” 2 x

5   !  1       1  .   2   1    7  !    6    6     .  6   !   2   2    .    3   2     1    !   7

We   wish  you  a Mer-ry  Christ-mas  we  wish you   a  Mer- -ry   Crist-

7    .  7   !  3   3   .    4   3      2   !  1      6    6       6   5  !   1      7       1  .     !!!

mas we wish  you  a   Mer-ry  Christ-mas and  a Hap- -py New Year

S    :  (Endehon: “Selamat Ari Natal):

Selamat Ari Natal, Selamat Ari Natal, Selamat Ari Natal, dohot Taon Baru 2x

P1  :  Hundul ma hamu saluhutna! Hamu angka dongan, taolophon jala taendehon ma hajujumpang ni Pesta Parningotan Hatutubu ni Tuhanta Jesus Kristus sadari on, marhite na marende sian Buku Ende No.57:1+3 na mangihut :

02. Marende Huria BE.57:1+3   “Nunga Jumpang Muse” BL.202

Nunga jumpang muse ari pesta i, hatutubu ni Tuhanta Jesus i

Tuat do Ibana sian surgo i mebat tu hita on

Hasangapon di Debata dame dame ma di jolma

Las ni roha ni Debata hajolmaon muse.

………….Jongjong……………….

Sombanami ma di Ho na tubu on Ho silehon dame tu portibi on!

Sai pasaorhon ma tu rohanami on dameMi o Jesus

Hasangapon di Debata dame dame ma di jolma

Las ni roha ni Debata hajolmaon muse.

03. VOTUM-INTROITUS-TANGIANG

P2  :  Tapungka ma Ibadah Pesta Parningotan Hatutubu ni Tuhanta Jesus Kristus di hurianta sadari on marhitehite goar ni Debata Ama, AnakNa Tuhan Jesus Kristus, dohot Tondi Parbadia.

H    :  Amin

P1  :  Nunga tubu di hita sada posoposo, dilehon tu hita sada Anak, pampe tu abaraNa do sogot harajaon, jala bahenonna GoarNa:

H    :  Sipartahi halongangan, Ulubalang ni Debata Ama, salelengnilelengna, Raja ni hadameon.

P2  :  Endehon hamu sada ende na imbaru di Jahowa, ale sandok tano on. Pajojor hamu ma di tongatonga ni angka sipelebegu hamuliaonNa i, di tongatonga ni saluhut bangso halongangan, angka na binahenNa i.

P1  :  Marsomba ma hamu tu Jahowa marpahean na marhadohoan, angka hitir ma hamu maradophon Ibana, ale isi ni sandok tano on. Haleluya

H    ( Mangendehon : Haleluya!)

P2  :  Martangiang ma hita : Ale Debata Amanami na dibanua ginjang! Mandok mauliate do hami tu Ho, ala ni godang ni asi ni rohaM di hami; ai dibasabasahon Ho do AnakMu na sasada i tu hami na dipardangolan on, asa malua hami marhitehite Ibana sian dosa dohot sian hamatean saleleng ni lelengna. Hupangido hami tu Ho, sai sondangi ma rohanami na holom i marhitehite Tondi Parbadia i; angkup ni i, sai parrohai ma hami, asa huboto hami mandok mauliate tu Ho, asa tarapul situtu rohanami di hagogotan dohot pangunjunan marhitehite AnakMu, Tuhan Jesus Kristus Tuhannami. Amen ! (Hundul Ma Huria!)

04. Marende Huria BE.46:1+10   “Na Sian Ginjang Do Au” BL.33

P1  :  Nunga barita na uli sian banua ginjang, ima taringot tu hatutubu ni Tuhanta, Jesus Kristus Sipalua i. Jangkon ma Ibana bongot tu roham!

Na sian ginjang do au ro barita na imbaru do;

Huhut na uli situtu huboan tu sude hamu

O Jesus, haholonganki, bongoti dohot rohangki.

Pabali sian i sude na tau mangago au muse.


05. MANJAHA PATIK NI DEBATA

P2  :  Singkat ni Patik di Pesta Bolon Parningotan Hatutubu ni Tuhan ta Jesus sadari on tarsurat di Lukas 2:10 didok songon on : “Alai didok surusuruan ima tu nasida :

Pria: Unang mabiar hamu; ai barita halalas ni roha godang do huboan tu hamuna, parsaulian ni sandok bangso i.

Wnt:  Ai nunga tubu do di hamu saborgin on, di huta ni si Daud, Sipalua i, i ma Kristus, Tuhan i”

P1  :  Antong rap mangido gogo ma hita tu Tuhanta asa tarulahon hita Tona ni Debata :

H    :  Ale Tuhan Debata, sai pargogoi ma hami mangulahon na hombar tu Hatami. Amen!

06. Marende Huria BE.47:2+4   “Aut na saribu hali” ” BL.103

P2  :  Mansai lea do hatutubu ni Sipalua i uju i, i ma di bara ni pinahan. Alai na sangap do Ibana jala marmulia, ai Ibana do Panondang ni portibion. Jangkon ma Ibana, so tung unang lea roham mida hametmetonna i. Endehon ma i jala hobasi dirim manopoti dosam tu Debata!

Ianggo ho ale tondingku sai jangkon ma Panondang i.

Sai unang ma lea rohamu dibaen hametmetonna i;

Pabalionna do sude Sibolis dohot do sa pe.

………….Jongjong……………….

Dibahen i sai marsinondang ma baen haporseaon mi

Padenggan jala sai patorang roham ro diparangemi

Paboa marguna do Panondang na ro i di ho.


07. MANOPOTI DOSA

P1  :  Di na jongjong hita di mata ni Pesta Parningotan Hatutubu ni Tuhanta Jesus sadari on, tama taingot jala tatopoti dosa, hahurangan dohot pangalaosionta tu Debata. Ala ni i hohom ma jolo hita satongkin songon na manullingkiti rohanta!

…………doa dalam hati …………

P2  :  Ale Debata Amanami na dibanua ginjang ! Diparhatopot rohanami do balga ni holong dohot asi ni rohaM di hami. Dilehon Ho do AnakMu Tuhan Jesus Kristus tu portibi on, tubu dibagasan haleaon, manaon na porsuk pola ingkon mate tarsilang asa gabe haluaon di hami. Dia ma naung hubahen hami tu Ho balos ni i? Jotjot do mabalga hu’uari’ manang janji nami tu Ho, hape ndang tulus i huulahon hami. Molo jumpang ari Natal si songon on, sai maruari do hami marhite angka ende nami mandok: “Hulehon di Ibana sude na dia ua on. Olo, olo sude na di au on!” Hape dia ma naung hulehon hami huroha tu Ho ale Tuhan? So ndada gabe tardapot hami angka pargabus di jolom? Molo tung i pe, sai asi roham di hami, sesa dosanami!

H    :  (Endehon-Lambat) BE.No.53:2 “Di Betlehem do Tubu”  BL.51

Tu holong ni rohaNa Hubonom rohangkon;

Hulehon di Ibana sude na di au on. Olo, olo sude na dia on

P1  :  Ganup jumpang ari Natal sisongon on sai huendehon hami do: “Sai naeng haholonganku, Ho ale Tuhanki! Nang marsak, las rohangku ingkon lam ganda i ….!” Hape sabalikna do huulahon hami: Jotjot ndang huhaholongi hami Ho, sian nasa roha, ateate, pikkiran, dohot sian nasa gogo nami; suang songon i ndang huhaholongi hami dongannami doshon dirinami, nang lumobi angka musunami. Holan di masa ni pangunjunan, sitaonon, arsak, parungkilon di huringkoti hami Ho. Molo adong di hami be, nunga pintor ro ginjang ni roha; molo so jumpang pinangido ni roha nunga pintor mandele laos manundalhon Ho. Jotjot tahe Tuhan tardapot hami gabe angka jolma pargabus. Asi rohaM di hami, pargogoi hami manghaholongi Ho dohot angka dongannami lumobi nang musunami!

H    :  (Endehon-Lambat) BE.No.53:3 “Di Betlehem do Tubu”  BL.51

Sai naeng haholonganku, Ho ale Tuhanki

Nang marsak las rohangku, Ingkon lam ganda i.  Olo, olo ingkon lam ganda

P2  :  Ale Tuhan Debata, mansai burju do Ho mamasumasu ngolunami: di parianakhonon, di ulaon si ganup ari, jabatan, karier, prestasi kerja; dilehon Ho do di hami arta, sinamot, pansarian na tama, paruntungan, parlabaan dohot lan na asing, atik pe jotjot sai huparsoada hami do i na songon pasupasuM. Hape dia ma haburjuonnami naung hulehon hami tu Ho dohot tu huriaM balos ni naung hujalo hami suksuk sian Ho? Hata ni ende, na sai huendehon hami ganup jumpang ari Natal mandok: “Burju naeng lehononku di Ho rohangkinon…”. Tung adong ma haburjuonnami tu Ho Tuhan? Tung naung hulehon hami ma huroha ‘rohanaMi’ tu Ho? Molo tung adong hupelehonhami peleannami, pintor tuk ma i balos ni pasupasuM na sai godang i? Ale Tuhan ajari hami asa burju mangalehon rohanami dohot dirinami tu Ho!

H    :  (Endehon-Lambat) BE.No.53:4 “Di Betlehem do Tubu”  BL.51

Burju naeng lehononku Di Ho rohangkinon. Asi rohaM

Tuhanku Urupi au tongtong.  Olo, olo urupi au tongtong

P1  :  Hamu angka dongan! Nian asing ni angka naung taparhatopot nangkin, godang dope dosa dohot pangalasionta tu Debata; ndang tarpajojor hita i sadasada di ari on. Alai tung dia pe dosanta di adopan ni Debata, barita nauli di hita ari Pesta Hatutubu ni Tuhanta Jesus Kristus on mandok :

H    :  Ai naung tubu do di hamu saborngin on, di huta ni si Daud, Sipalua i, i ma Kristus, Tuhan i!”

P2  :  Pos ma rohamuna! Pabotohononku do tu hamu barita halalas ni roha godang sadari on, ima bagabaga ni Debata taringot tu hasesaan ni dosanta: “Songon on do panghaholongi ni Debata di portibi on, pola do AnakNa sasada i dilehon, asa unang mago ganup na porsea di Ibana, asa hangoluan na saleleng ni lelelngna di Ibana”. Hasangapon ma di Debata na di ginjang. Amen! — hundul —

08. Marende BE. No.52:1-2 “Hatuan Do Las ni Roha Do”

Hatuaon do las ni roha do Hatutubu ni Jesus i.

Mago do jolma, ro ma Tuhanta. Las be, Las be ma rohanta i.(2x)

Hatuan do las ni roha do, Hatutubu ni Jesus i.

Domu do hita tu Debatanta. Las be las be ma rohanta i. (2x)

09. MANJAHA EPISTEL : 5 MUSA 18 : 15 – 19

P1  :  Epistel di Pesta Bolon Hatutubu ni Tuhanta Jesus Kristus, tarsurat di 5 Musa 18:15-19 marsorinsorin ma hita manjaha :

H    :  Panurirang sada, songon ahu on patindangon ni Jahowa, Debatam sian tongatongami, sian angka hahaanggim; Ibana tama tangihononmuna.

P2  :  Hombar tu saluhut naung pinangido ni roham sian Jahowa, Debatam di Horeb, uju di ari parluhutan i, nimmu do: Ndang be tarpabegebege ahu soara ni Jahowa, Debatangku, jala ndang be tarpaidaida ahu api na bolon on, asa unang mate ahu.

H    :  Dung i ro ma hata ni Jahowa tu ahu: Denggan do hata na nidoknasida i.

P1  :  Ahu ma tutu patindangkon sogot di nasida sada Panurirang sian tongatonga ni hahaangginasida i, songon ho, jala Ahu mangalehon angka hatangku tu bagasan pamanganna, gabe hatahononna tu nasida saluhut na hutonahon i tu Ibana.

H    :  Jadi manang ise na so olo tumangihon hatangki, angka sihatahononna di bagasan Goarhu, ingkon Ahu mangaluluhonsa tu Ibana

P2  :  Martua do angka na tumangihon hata ni Debata jala na umpeopsa!

H    :  Amen

10. KOOR  :

11. MARENDE HURIA BE. HKBP No. 48:2-3   “Ria ma hita sasude” BL.16

P1  :  Marhite hatutubu ni Jesus, Sipalua i nunga mungkap dalanta tu banua ginjang; hita na mian di pardangolan dapotan asiasi dohot panghirimon. Tahalashon ma haroroNa i tu hasiangan on marhite endenta, laos tahatindanghon haporseaonta i.

Di ungkap Debatanta do Banuaginjang i, Disuru do AnakNa i.

(Hangoluanta i) 2 x

….Jongjong…

Ampuan ni Amana do tinadingkonna i.

Tu hasiangan on do ro ( Tu pardangolan i) 2x

12. MANGHATINDANGKON HAPORSEAN

P2  : Tahatindangkon ma haporseaonta i, rap ma hita mandok :

H    : Ahu porsea di Debata Jahowa  . . . “ du

….Hundul…

13. KOOR:

14. SUNGGUL-SUNGGUL (BOABOA)

15. KOOR:

16. MARENDE HURIA BE. 49:1… “Sai ro ma tu bara”  (Pelean IA/IB) BL.47

P1  :  Bara ni pinahan na di huta Betlehem, i do hatubuan ni Kristus i. Mansai uli rupana, marsinondang bohiNa jala gok hadameon. Ro ma hita tu Betlehem marsomba ma hita songon parmahan i. Antong, tajangkon ma Ibana marhite na paradehon ngolunta gabe ‘bara ni pinahan’ hatubuan ni Sipalua i. Tapasahat nang peleanta, las ni rohanta manjangkon hatutubuNa!

Sai ro ma tu bara di Betlehem on,  hamu na porsea hatop ma tu son.

Marnida halalasan ni rohanta i, tinongos ni Ama na di surgo i.

O, ida hamu ma di bara inon, dakdanak na tubu disi borngin on.

Uli do rupana mata na tiur, o bereng Ibana, ho gabe tiur.

………….Musik……………….

Las roha Maria nang Josep disi Marnida na metmet na sorang tusi

Marsomba tu patna do parmahan i Di ginjang marende pardisurgo i.

Pasinggang  ma totmu hamuna sude Maniru parmahan marsomba muse

Marende hamu na marlas roha i Maniru suruan na di ginjang i


17. JAMITA : LUKAS 2  : 15 – 20


18. MARENDE HURIA BE. 616:1-3  “Uli na i di borgin na badia”  (Pelean II)

Pdt :  Di hatutubu Jesus i, humirdophirdop do bintang di langit i, I ma bintang ni Tuhan i, na patuduhon Raja Bolon do na tubu i, na ro sian banua ginjang. I do patudu dalan tu Parroha na sian purba asa sahat tu bara i. Jesus Kristus do Panondang naung ro tu portibi on ( Joh.8:12), jangkon ma Ibana asa disondangi roham jala tiur ngolum dohot ngolumgolum tu joloan on. Endehon ma “Uli na i di borgin na badia”

Uli na i di borgin na badia humirdophirdop do bintang disi.

Di borgin i do tubu Sipalua di panggagatan di Betlehem i.

Portibi on dangol gok haholomon marnida sondang ni Tuhanta i.

Reff : Uli na i marende do suruan di borngin i do tubu Kristus i

Di borngin i do tubu Kristus i.

Sian na dao parroha sian purba Ro do tinogihon ni bintang i.  Marsinggang be nasida lao marsomba tu Jesus Kristus Sipalua i. Ibana ro sian banua ginjang laho paluahon hita jolma i.

Reff :      Uli na i marende do suruan di borngin i do tubu Kristus i

Di borngin i do tubu Kristus i.

—musik—

Uli na i sude marlas ni roha ala naung songgop harajaonNa i. Huria i ria do ro marsomba mamuji Raja na sun sangap i. Ibana do panondang hangoluan namangalehon panghirimon i.

Reff :      Uli na i marende do suruan di borngin i do tubu Kristus i

Di borngin i do tubu Kristus i.


19. PARSURUAN TU NGOLU SIAP ARI

Pdt :  Gabe daging ma Hata i jala maringan di tongatonga ni hita on …!”  On ma barita Natal mangihuthon si Johannes, laos i do nang panghorhon ni Pesta Natal di hita, asa tapatuduhon Jesus Kristus i ‘mangolu’ dibagasan diri, keluarga dohot hurianta. Antong tajangkon ma Ibana mian dibagasan ngolunta dohot keluarganta; taboan ma Ibana mulak sian parpestaan on tu angka bagasta asa mian Ibana di tongatonganta ganup ari!

H    :  (Mangendehon BE Suplemen No.614:1 “Tabe ma di Ho”

Tabe ma di Ho o Jesus Tuhanki sian banua ginjang haroroMi

Tabe ma di Ho o Tuhan Sipalua i Dame binoanMu ndang na tarasam i o Tuhanki

Pdt :  Dibagasan partondionta nunga dohot hita nuaeng jongjong dibara ni pinahan na di Betlehem na di Betlehem I; di adopanta do posoposo i, ima Jesus Kristus Tuhanta i. Somba ma Ibana marhite ngolum dohot ulaonmu, parangehon hataNa, mangolu ma ho dibagasan dame na sian Tuhanta i. I ma kado silehonlehonmu tu Jesus na sorang i.

H    :  (Mangendehon BE Suplemen No.614:2 “Tabe ma di Ho”

Asi ma roham di au o Tuhanki Sai jalo ma tangiang nang endengki.

Songon si Maria ina na martua i Baen nang au martua ala haroroMi, o Tuhanki.

Pdt :  Marhite naung tapangan roti jala tainum anggur parpadanan na sian Tuhan Jesus Kristus. Antong tapardagingkon ma pamatang ni Jesus Kristus i jala taparmudarhon  ma nang mudarNa i. Antong patuduhon ma i marhite pangalahom dohot bangkom siganup ari maniru Tuhan Jesus Kristus.

H    :  (Mangendehon BE Suplemen No.614:3 “Tabe ma di Ho”

Nang parhapistaran sian purba i. Manungkap do marsomba tu Tuhan i.

Sere dohot na anggur ro di haminjon i; dipelehon tu Ho Raja na sorang i.

O Tuhanki.

20. TANGIANG PELEAN-HATUTUBU-ALE AMANAMI-PASUPASU (AGENDA HKBP)


21. MASIJALANGAN TU JOLO

About these ads
Ikuti

Get every new post delivered to your Inbox.

Bergabunglah dengan 2.697 pengikut lainnya.

%d bloggers like this: