Archive for Maret 7, 2009

Parturena Pasahathon Tohonan Hapanditaon

XVI. Pasahathon tohonan hapanditaon

 

Marende         :

 

         Ale Tuhan Debata ! Amanami, Parasiroha na sumurung, Didokhon AnakMu do hami mangido panabi angka na burju tu Ho, sisuruonMu tu sisabion I, mamaritahon HataM tu jolma. Ala ni I umbahen na ro hami nuaeng tu joloM mangasahon Tuhan Jesus Kristus Tuhannami mangido tu Ho : Sai topot ma hami  na pungu dison laho pasahathon ulaon hapanditaon tu angka dongannami on. Lehon ma Tondi Parbadia tu nasida angka naung pinabangkitMu asa malo nasida manjamitahon HataM, asa marhiras ni roha nasida mamboan Barita na Uli bahen hamuliaon di Anak haholongan ni rohaM. Ungkap jala patiur ma rohanasida tongtong maniop HataM dohot mangharingkothon ulaon na pinasahatMu tu nasida. Sai tumpahi ma ulaonnasida, asa maruli upa nasida rap dohot angka a pinarmahanna di hangoluan sogot marhitehite Tuhan Jesus Kristus Tuhannami. Amen.

         Hamu ale dongan ! Disuru Amanta na di banua ginjang I do AnakNa Tuhan Jesus Kristus tu tano on gab jolma, asa tarbahen jolama manisia mananda holong ni roha ni Debata di nasida, asa marpos ni roha nasida di Ibana jala sumuang nasida ti harajaonNa, gabe masuk nasida tumean hangoluan na saleleng ni lelengna. Jadi dung sun ulaon ni Anak ni Debata di tano on, dipasahat ma tohonan tu angka anak siseran I, asa nasida paboahon  dohot pashathon naung hinamonangkonNa I tu donganna jolma. Angkup ni I didok  Apostel Paulus do : Dipabangkit Tuhanta do deba gabe Apostel, deba gabe panurirang deba gabe parbarita, deba gabe parmahan, deba gabe pangajari, asa sun denggan angka na badia I tu ulaon i. Sian I ma tangkas taboto : Tuhan Jesus do mamajokhon tohonan hapanditaon.

         Mangihuthon hata ondeng, sai dipabangkit Debata di tongatonga ni HuriaNa angka Pandita, mulai intap ni dung ojak Huria I di tano on ro di tingki nuaeng.

         Dung I jahaon ni Ephorus dohot donganna : Bege hamu nuaeng pandok ni Debata taringot tun tohonan ni hapanditaon. Mat 28 : 18 – 20, Joh 21 : 15 – 17, Ulaon ni Apostel 20 : 17 – 35, 1 Tim 3 : 1 – 7, 2 Tim 1 : 5b.

 

Marende         :

 

         Antong ale dongan ! Tohonan na badia do sijaloonmuna nueng, ai sian Tuhan Jesus do tohonan na songon i. Ala ni I hupasingothon jala hupaboa ma tu hamu parture ni pangaradotion di tohonan hapanditaon, asa tangkas diboto hamu dokdok ni tohonan i.

  

I.    Ramotanmuna ma arta sian Tuhan Jesus, songon na bin ahen ni  parmahan mangaramoti na di ibana, asa unang mago. Ai peakhononmuna do sogot rujiruji taringot tu angka pinarmahanmuna di jolo ni Tuhan i. Na gabe sitiruon do hamu di jolo nia angka na pinasahat tu hamu. Dibahen I tangkas ma hatahon hamu tu nasida Hata ni Debata, na tarsurat di angka surat na di Padan na Robi dohot di angka surat na di padan na Imbaru. Buat hamu ma sian Hata I poda, apoapo, sipaingot, apulapul dohot hata paminsangon, hombar tu angka na masa. Songon I do dibahen angka Apostel, songon na nidok ni Apostel Petrus: Molo adong na marjamita, dihatahon ma hatana songon Hata ni Debata; molo adong manang ise na marhobas hombar ma I tu gogo na nilehon ni Debata, asa dapotan hasangapon Debata marhitehite Tuhan Jesus Kristus di na saluhutna. Sialoonmuna jala sitaluhononmuna ma nasa hatahata, na marsalisi tu Hata ni Debata. Marlambok ni roha ma hamu maminsangi angka na mangalo, anggiat dilehon Debata ni roha, asa diboto nasida hasintongan. Antong diramoti hamu ma dirimuna dohot na sapunguan I, manang tu dia hamu dipaojak Tondi Parbadia asa diparmahani hamu Huria ni Debata, na hinophopNa I marhitehite Tuhan Jesus Kristus. Ingkon baritahononmuna do hata sihaporseaan I, I ma na nilehon ni Debata padengganhon jolma tu Ibana, ai I do dalan tu hangoluan, dalan tu hamubaon ni roha dohot dalan pardamean tu angka na pinasahat tu hamu. Antong singkat ni Kristus I do hamu mangelekelek jala dohononmuna ma tu jolma I : Sai olo ma hamu padengganhon tu Debata.

II.     Songon tangkas ni pamodaionmuna di angka na olo tu hadaulaton tu Debata, ingkon songon I ma tangkas paminsagonmuna di angka na so olo tu hangoluan, asa unang adong na mago, ala so ada sipaingot, jala unang marsapata nasida tu hamu. Ingot hamu ma na tarsurat i. Ia ho ale anak ni jolma ! Nunga hupabangkit ho gabe siparmahan ni halak Israel, ingkon tangihononmu Hata na ruar sian pamanganHu. SingkatHu ma ho, palumbahon nasida. Molo hudok tu angka pardosa na tu hamatean nama ho, gabe so dipalumba ho ibana, ndang diapuli ho ibana, asa dipauba rohana, asa mangolu, na mate do tutu pardosa I ala ni dosana, alai sian tanganmu do tunguonHu mudarna. Alai molo dipalumba ho pardosa I, hape ndang dipauba rohana dohot pambahenanna, mate ma ibana tutu di bagasan dosana, alai malua do ianggo tondim.

III.   Alai ndada holan ulaon ondeng na pinasahat tu Pandita. Ai di na laho manadingkon tano on Tuhan Jesus, jumolo do dipadiri ulaon na badia na dua ragam i. Na mangan parpadanan na badia do na saragam. Na saragam  nari, I ma pandidion na badia, na tinonahonNa I di na laho manaek           Ibana tu banua ginjang. Asa radotanmuna ma ulaon na badia na dua ragam I; songon parhobas di bagas ni Debata ma hamu mangulahonsa. Tangkas ma pamanat hamu angka dongan I, asa holan angka na tau, angka na tumanada dosana, angka na mangarsakhon pambahenanna jala na olo paubahon rohana manjonohi panganon na badia i. Ambatonmuna do angka na jungkat, anka na lomo roha di dosa, asa unang dijonohi na badia i. Ingot hamu ma : Dipasahat Tuhan Jesus do anakhinsu ni banua  ni banua ginjang tu HuriaNa I, asa dipabali angka na so olo paubahon rohana, ai ninna do : Hulehon pe tu anakhinsu ni harajaon na di angka banua ginjang i. Nasa na niihotanmi di tano on, harhar do I nang  di angka banua ginjang. Didok Tuhan Jesus dope : Jalo hamu ma Tondi Parbadia ! Molo disesa hamu dosa ni manang ise, naung sesa ma I, molo dipahot hamu dosa ni manang ise naung hot do i.

IV.  Angkup ni radot ma hamu patureturehon angka dakdanak, maniru pambahen ni Tuhan Jesus. Ai didok Tuhan Jesus sahali : Loas hamu ma angka dakdanak I ro tu Ahu, unang orai hamu nasida, ai di angka sisongon I do harajaon ni Debata. Dibahen I ajarhon hamu ma pamusatan ni Hata ni Debata (Katechismus) dohot jamita tu angka dakdanak. Podai hamu ma nasida, asa diboto hadaulaton tu Debata dohot hapantunon tu jolma. Ambat hamu ma nasa na tau mangago dakdanak, ai parmahan do hamu, songon naung nidok ni Tuhan Jesus : Parmahani ma angka anak ni birubirungku.

V.     Ramoti hamu ma saluhut pangisi ni Huria I, angka na mabalu, angka ama, ina dolidoli dohot  anakboru, maniru pambahen ni Apostel Paulus. Ai ninna do tu halak Epesus : Dibahen I jaga ma hamu, ingot hamu ma nasa na so mansohot ahu saleleng ni tolu taon arian dohot borngin, paingothon ganup hamu huhut mariluilu. Tangiangkon hamu ma saluhut na pinasahat tu hamu, asa diramoti Tuhan Jesus nasida jala dipasupasu marhitehite Tondi Parbadia.

VI.  Angkup ni I sai ture ma parangemuna, asa tau tiruan hamu di angka na pinarmahanmuna I, tiruan di hata, di pangalaho, di haporseaon dohot di holong ni roha. Ingot hamu ma na nidok ni Hata ni Debata : Ingkon unang marhaurahon Sintua I, harajaan ni sada boruboru, unang parmabuk, na marroha na ture marparange, na las roha di tamue, pangajari, unang sisobur tuak, unang panglinsingi, unang parpangomoan na so tama, alai ingkon partalup ni roha do, na so parbada, na so impolan di perak,  na denggan mangarajai donganna sabagas, parianakhon sioloi ajar di bagasan nasa hatomanon. Ai molo adong manang ise, na so malo manggomgomi isi ni bagasna tung beha ma tarpatursa Huria ni Debata.

VII. Ingkon ture bahenonmuna saluhut aturan ni ulaonmuna I mangihuthon patik ni indukmuna. Sahata ma hamu dohot angka dongan Pandita : Di  pangalaho ni pangoloion tu Debata, unang pulikpulik marpingkiran, unang marsalisi hata dohot roha, unang masigasipan, asa saut di hamu na pinagido ni Tuhan Jesus sian AmaNa di na nidokNa I : Sai tongtong ma di GoarMu nasida na nilehonMi tu Ahu, asa sada nasida songon Hita.

 

Marende         :

 

         Antong nunga dibege hamu hatorangan taringot tu tohonan hapanditaon songon na pinatorang ni Hata ni Debata.

 

Na manungkun ma ahu nuaeng di hamu :

1.      Diaprhatutu roham do : Angka surat na di Padan na Robi dohot angka surat na di Padan na Imbaru, I do Hata ni Debata na patuduhon dalan tu hangoluan na so ra suda, jala na olo do ho mambolongkon saluhut poda na asing jala mangalo na marsalisi tu Hata na tarsurat disi ?

      Alus :……

2.      Na olo do ho mangulahon tohonan I hombar tu na hujaha nangkin, I ma taringot tu poda  dohot pangalaho, jala na olo do ho marateatehon hata paminsangon na sian indukmu di tingkina ?

      Alus :……

 

         Antong na jongjong do hamu di jolo ni Debata dohot di jolo ni Huria on. Molo naung sada situtu rohamuna manjalo tohonan hapanditaon jala molo na olo do hamu mangulahonsa sian nasa rohamuna, dok hamu ma :

      “Na olo do ahu; Sai didongani asi ni roha ni Debata ma ahu patupahon saluhutna I !”

 

Marende               :

Ephorus mandok : Hupabangkit jala huurasi ho gabe Pandita di Huria Kristen Batak Protestant marhitehite Goar ni Debata Ama, Anak dohot Tondi Parbadia. Dipatiur, dipargogoi jala ditogutogu Tuhanta I ma ho marhitehite Tondi Parbadia.  Mangulahon tohonan hapanditaon, asa gabe pangula na burju ho, na marpabuehon parbue na denggan ro di saleleng ni lelengna. Dipatau Debata ma ho tu angka ulaon I, mangulahon na hombar tu HataNa marhitehite Tuhan Jesus Kristus, sipasangapon I ro di saleleng ni lelengna ! Amen.

 

Sada Pandita mandok hata          :

Mandok hata Parhalado Pusat    :

Marende               :

 

Martangiang        :

         Ale Tuhan Debata, Amanami na di banua ginjang ! Sasada Ho do na patauhon angka naposoM, an sinuruM tu angka Huria i. Ho do mangalehon huaso dohot hamaloon, asa tarida jala lam timbul ulaonMu. Ala ni I umbahen na ro hami marhitehite Tuhan Jesus Kristus Tuhannami, mangido tu Ho : Patiur ma roha ni roha ni angka naposoM on. Iringiring ma nasida marhitehite tanganMu na badia i. sai pamalo nasida mangulahon tohonanna na pinasahatMu tu asida sadari on, asa ture ualaonnasida dibagasan HuriaM, jala lam rarat harajaonMu tu liat portibi on. Sai lehon TondiM na badia I mangajari dohot manogunogu nasida, asa tartogihon nasida angka donganna jolma na hinophop ni AnakMu marhitehite mudarNa na badia I, gabe mulak tu Ho asa rap hami di hasonangan pasangaphon Ho di bagasan Tuhan Jesus Kristus Tuhannami. Amen.

 

         Ale Amanami na di banua ginjang ! Sai pinarbadia ma GoarMu ! Sai ro ma harajaonMu ! Sai saut ma lomo ni rohaM di banua tonga on songon na di banua ginjang ! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan na mardosa tu hami ! Unang hami togihon tu pangunjunan ! palua ma hami sian pangago ! Ai Ho do nampuna harajaon dohot hagogoon ro di hasangapon saleleng ni lelengna ! Amen.

 

Pasupasu              :

 

Marende               :          

Komentar dimatikan

Parturena Pasahathon Tohonan Haguruon

 

XV. Pasahathon tohonan haguruon

 

Marende               :

 

         Ale angka dongan, na jongjong do nuaeng di jolonta angka donganta na poso na marsiajar nasailaon di Seminarie, asa gabe Guru nasida di Huria Kristen Batak Protestant. Umbahen na marpungu hita dison, ala naung monang nasida  di examen nambura pinamasa I, huhut ala nuaeng pasahathon tu nasida sadari on tohonan haguruon i. Antong rap ma hita mangido gogo na sian Debata nasida mangula ulaon na pinasahat tu nasida.

         Antong tangihon hamu ma jolo poda taringot tu haguruon, na ingkon ulahonmuna :

1.      Dongan ni Pandita  do hamu jala mamatamatahon ruas ni Huria na masuk tu Huria Kristen Batak Protestant. Hamu do dongan ni Pandita, laho manjamitahon Hata hangoluan na tarsurat di Padan na Robi dohot  di padan na Imbaru di tongatonga ni Huria sipasahaton tu hamu be.

2.      Ala parjamita di Huria hamu, bahenonmuna ma nasa gogomuna marmahani birubiru ni Tuhanta, I ma angka  ruas ni Huria  na balga nang na metmet, na poso dohot na matua, na marsahit dohot na hisar, na jengkel dohot na burju. Apulanmuna ma angka na marsak, tungkolanmuna angka na mabalu dohot angka na tading maetek.

3.      Laos songon I apoanmuna halak sipelebegu dohot halak Silom dohot sandok angka na asing pe na manimbil sian Hata ni Debata dohot sian HuriaNa, asa dohot  nasida  marsaulihon na pinatupa ni Tuhan Jesus, ojahan ni haporseaonta i.

4.      Ala guru hamu di Huria Kristen Batak Protestant, pasahaton ma muse  tu hamu angka dakdanak siajaranmuna/sitogutoguonmuna. Tamba ni angka parbinotoan sikola ajarhononmuna tu nasida nang Hata ni Debata, anggiat tartogu nasida tu panandaon di Tuhanta Jesus.

5.      Asa saut angka na nidok ondeng, ingkon marparange na denggan ma hamu di jolo ni Debata nang di jolo ni jolma. Tau tiruan ma hamu di angka na pinasahat ni Debata tu hamu. Sandok hata naung pinasahat tu hamu, radoti  hamu sian nasa rohamuna hombar tu Hata ni Debata na maolin i.

         Paboa naung sada  rohamuna mangoloi saluhutna I di jolo ni HuriaNa, dok hamu ma : Na olo do ahu ! Sai didongani asi ni roha ni debata ma ahu patupahon saluhutna i.

 

Marende nasida   :

 

 

 

 

 

 

 

 

 

Mardebadeba ro tu jolo marsinggang     :

         Guru……….Hupasahat ma tu ho tohonan dohot pajamitaon di Huria Jristen Batak Protestant marhitehite Goar ni Debata Ama, Anak dohot Tondi Parbadia. Dipatiur, dipargogoi jala ditogutogu Tuhanta I ma hamu marhitehite Tondi Parbadia mangulahon ulaonmuna, asa gabe pangula na burju hamu, marparbuehon na denggan ro di saleleng ni lelengna. Amen

 

 

Martangiang  :

         Ale Tuhan Debata, Amanami na banua ginjang ! Sasada Ho do patuahon angka naposoM na sinuruM tu angka Huria i. Ho do mangalehon huaso dohot dohot hamaloon, asa tarida jala lam timbul ulaonMi. Ala ni I umbahen na ro hami marhitehite Tuhan Jesus Kristus Tuhannami mangido tu Ho : patiur ma roha ni angka naposoM on. Iringiring ma nasida marhitehite tanganMu na badia i. Sai pamalo ma nasida mangulahon tohonan na pinasahatMi tu nasida sadari on, asa ture ulaonnasida di bagasan HuriaM jala lam rarat harajaonMu tu liat portibi on.

         Sai lehon ma TondiM na badia I mangajari dohot manogunogu nasida, asa tartogihon nasida angka donganna naung hinophop ni AnakMu marhitehite mudarNa na badia I mulak tu Ho, asa rap hami di hasonangan pasangaphon Ho di bagasan Jesus Kristus Tuhannami. Amen.

 

Marende Sikola   :

 

Maratangiang      : Ale Amanami d.u.

 

Pasupasu              :

 

Marende               :

 

 

 

 

 

 

 

 

 

 

 

 

 

 

 

 

 

 

 

Komentar dimatikan

Parturena Manjanghon Sintua

XIV. Manjangkon Sintua

 

Marende               :

              

               Hamu ale angka dongan na saHuria on ! Diida hamu do nuaeng donganta na jongjong dison na itapilit bahen Sintua di tongatonganta. Naeng pangidoannasida ma pasupasu sian Tuhanta I, asa margogo nasida mangulahon ulaonnasida.

               Antong tabege ma jolo pangarimpunan ni ulaon ni Sintua.

1.      Pangula ni Huria do nasida mamatamatahon dongan angka na pinasahat tu nasida dohot mangaramoti  parangenasida. Molo diboto nasida, na hurang ture parange ni manang ise, ingkon pinsangonnasida tu Guru dohot tu Pandita, asa dipature.

2.      Mandasdas donganta tu parmingguan dohot manangkasi alana umabahen  na so ro.

3.      Mandasdas anakboru sikola, asa ondop ro.

4.      Maningkir angka na marsahit jala paturehon na ringkot tu nasida dohot nasa na tarpatupasa, ala na rumingkot, pasingothon Hata ni Debata tu nasida dohot tumangiangkonsa.

5.      Mangapuli angka na marsak, paturehon angka na dangol dohot na pogos.

6.      Mangapuli angka sipelebegu, angka parugamo na asing dohot angka na lilu, asa dohot marsaulihon hangoluan na pinatupa ni Tuhan Jesus.

7.      Mangurupi paturehon angka guguan dohot ulaon na ringkot tu Harajaon ni Debata.

         On pe, hamu na hinaholongan, naeng tangkas  botoonnami burju ni rohamuna mangaradoti ulaon hasintuaon i. Dibahen I alusi hamu ma na husungkunhon tu hamu :

         1.   Na olo do hamu mamarangehon parange na tama di jolo ni debata  dohot di jolo ni jolma ?

2.      Na olo do hamu manalo ulaon hasintuaon songon na hupajojor ondeng tu hamu ?

1.      Na olo do hamu mangaradoti sude sian nasa roha dohot sian nasa gogomuna hombar tu Hata ni Debata ?

         Molo sada rohamuna mangoloi jala marpadanhon sudena i di jolo ni Debata dohot di jolo ni donganta on, dok hamu ma : Olo.

         Antong marsijalangan ma hita, paboa hot ni padanmuna I jala paboa na olo do hamu mangula ulaon ni Debata rap dohot hami.

         Sai diparrohai Tuhan Debata, Ama Tuhanta Jesus Kristus ma hamu, marhitehite Tondi Parbadia mangkaburjuhon siulaonmuna, na pinasahat tu hamu sadari on, asa marsangap Debata di tongatonga ni HuriaNa i. Amen.

 

 

 

 

 

 

 

         Hamu angka dongan na di Huria on jangkon hamu ma nasida di bagasan dame. Sude ma hita on manggogo tumangiangkon nasida, asa manjadi ulaonnasida I, huhut mangkorhon hasangapon ni Tuhanta.

 

Tangiang         :

         Ale Tuhan Debata Amanami na di banua ginjang ! Mauliate ma rohanami tu Ho ala ni asi ni rohaM di angka dongannami on. Sai tamabai ma tu rohanasida angka silehonlehon ni Tondi Parbadia, asa la marroha jala margogo nasida mangaradoti tohonan na sahat tu nasida. Asi  ma rohaM dohot di sude ruas  ni HuriaM on, asa lam hot haporseaonnasida be, jala lam ture parangenasida mangihuthon Ho. Sungguli ma rohanami asa masihaholongan, unang adong sipinsangon di hami, asa lam rarat harajaonMu, jala marmulia GoarMu na badia i. Amen.

         Ale Amanami na di banua ginjang ! Amen.

 

Pasupasu              :

 

Marende               :

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Komentar dimatikan

Parturena Paluahon Uhum

I.            Paluahon angka na hona uhum parhuriaon

 

               (Ia adong nung bali sian Huria naung pinareso ni Kerkeraad jala naung tiningtingkon di jolo ni Huria I, na tarsurat di toru ni on ma pangkeon laho manjangkon naung bali tu Huria).

               Hamu ale angka dongan na hinaholongan ni Debata ! Jangkonon ma hamu sadari on gabe sumuang songon donganta hian. Las do roha  ni debata molo dung ditanda jolma dosana, ai didok ibaa do : Ndang lomo rohangKu mida hamatean ni parjahat I, dipauba ma nian rohana asa mangolu ibana.

               Antong manugkun  ma ahu nuaeng di hamu ale si Anu :

1.      Diparhatutu hamu do dosamuna di jolo ni Debata dohot di jolo ni Huria na marpungu  dison, jala na tarsolsol bagi do hamu ala ni na niulahonmuna najolo ? Molo songon I rohamuna, dok hamu ma : Olo.

2.      Dipangido rohamuna nuaeng jangkonon hamu mulak tu Huria ni Kristus jala na olo do hamu tu joloan on marparangehon parange, na hombar tu Patik dohot Hata ni Debata ? Molo songon I rohamuna, dok hamu ma : Olo.

 

               Antong mangasahon gogo ni Tuhan Jesus Kristus, na pinasahatNa tu HuriaNa I, jinangkon ma hamu sadari on sumuang tu Huria ni Kristus I, asa martohap hamu muse di Tuhan Jesus, ro di ulaon na badia, ro di sude pasupasu dohot asi ni roha ni Debata. Sai hot ma rohamuna marhaporseaon di Ibana ro di hasusuda ni bohalmuna. Sai dungo ma hamu tu joloan on maralohon angkal ni sibolis dohot roha sibuk dohot roha portibi on, asa unang talu be hamu di pangunjunan. Sai haholongi hamu ma Tuhan Jesus jala sai  paingotingot hamu ma HataNa na denggan I, asa masuk hamu muse tu banua ginjang.

 

Tangiang      :

               Ale Tuhan Debata Amanami ! Mauliate ma rohanami tu Ho marhitehite AnakMi Tuhan Jesus Kristus, ala naung muba roha ni dongannami on jala mulak tu Ho. Las situtu rohanami ala ni i. Asi ma rohaM, lam panghilalahon ma godang ni holong ni rohaM tu nasida, asa lam ringgas rohanasida mangoloi HataM. Sai patongtong ma rohanasida mandalani dalan tu hangoluan. Alai patondithon ma tu roha ni hami on sude dokdok ni habalion sian joloM dohot sian tongatonga ni HuriaM, asa hot hami sude di bagasan tanganMu jala partohap di ha\ngoluan sogot. Amen.

               Ale Amanami d.u.

 

Pasupasu     :

 

Marende      :

 

 

 

 

 

 

 

 

 

 

Komentar dimatikan

Parturena Pasahathon Uhum

A.     PANGUHUMON PARJOLO

 

               Hamu ale dongan, na hinaholongan ni Debata ! Diboto do naung diose si Anu padan, na nioloanna tu Debata di na tardidi ibana, ai na mangulahon dosa na balga do ibana (goaron ma dosana I). Ala ni I umbahen hupasahat ibana tu uhuman Huria, ndang jadi dohot be ibana marulaon na badia, mangihuthon  tona ni Tuhan Jesus Kristus na tinonahonNa I tu HuriaNa. Saleleng so dipauba ibana rohana, ndang jadi ibana dohot marulaon na badia. Na bali ma ibana dohot sian nasa tohonan na di bagasan Huria. Molo mate ibana, ndang jadi tanomon di tongatonga ni halak Kristen, ingkon tar tungkan suhi ni parbandaan do. Ndang udurhonon ni Pandita manang Guru ibana jala ndang endean ni anak sikola, jala ndang paluon giringgiring di na laho mananom. Ala ni I huapoi ma hamu saluhut, asa ditangiangkon hamu ibana, anggiat disolsoli rohana ala ni dosana I, jala dipauba rohana, jala dilului muse Tuhanta I, na marasi ni roha mida pardosa, na manolsoli rohana sngon si Petrus. Ai ndang marlomo  ni roha Debata mida hamagoan ni manang ise, alai dipangido rohaNa, paubaon ni pardosa rohana, asa mangolu ibana. Amen.

 

B. PANGUHUMON NA DOKDOK SITUTU

 

               Hamu ale dongan, angka na pinarhamaol ni Debata ! Nunga jotjot tinaringotan tu hamu dosa dohot jat ni haroahon ni donganta si Anu, jala nunga jotjot pinaingot ibana jala tinagiangkon huhut, anggiat mulak ninna rohan tu Debata, asa tanggal angka rante ni sibolis I sian Tondina, gabe mangulahi rohana marparangehon na pinangido ni roha ni Debata. Alai atik pe songon I, ndang olo ibana paubahon rohana, baliksa lam dipatangkangdo mandatdati manambai dosana. Atik pe pinaida ibana manolsoli nasailaon, ndang tarjua hita be so pasahatonta ibana tu panguhumon na dokdok situtu mangihuthon pandokhon ni Debata di bagasan  HataNa, anggiat olo ibana manolsoli rohana, asa unang tubu parmaraan di hita, na sada daging, bahenon ni sada ruas na busuk, na so hadaonan I, asa unang targasip manang ise sian hita on maniru pambahenanna I jala unang marlea Goar ni Debata.

               Antong ale angka dongan, na pungu do hita nuaeng dison ro di Guru dohot Sintua marhitehite Goar ni Tuhan Jesus Kristus. Marningot Hata ni Tuhan Jesus, na tinonahonNa di surat ni si Matheus bindu 18, na mandok : “Situtu do na hudok on tu hamu, manang dia na pinahotmuna di tano on, naung hot do I nang di banua ginjang”. Pangkeonta ma huaso na pinasahatNa tu HuriaNa i. sahat ma daging ni si Anu tu tangan ni sibolis na nioloanna I nasailaon ; naung bali do ibana sian nasa parsaulian na di Huria ni Kristus, ndang be dohot ibana etongon partohap di angka ulaon na badia ro di angka pasupasu angka na pinarbagabagaNa jala na binasabasahonNa tu angka na porsea di Ibana, saleleng so olo ibana paubahon rohana. Asa ingkon songon halak sipelebegu nama ibana etongon ni rohamuna.

 

 

 

 

On pe, hamu ale angka dongan halak Kristen, unang be marparsaoran hamu tu ibana, anggiat olo maila jala anggiat olo mulak rohana tu bagasan ; alai unang rajumi hamu ibana songon musu, paingot hamu ibana tagonan songon dongan na lilu.

               Alai tama do manonditnondit roha ni hita on sudena marnida ibana, sai dihabiari rohanta ma Debata ! Manang ise pe hita on, ia didok rohana di bagasan na hot ibana jongjong, manatmanat ma ibana, asa unang tinggang ! tagogo be pasaorhon rohanta tu roha ni Debata Ama dohot AnakNa Tuhan Jesus Kristus dohot tu  dongan na porsea situtu, asa tung hot rohanta tongtong tu Tuhan I ro di ajalta be, asa maruli hita di hangoluan  na so ra suda. Diida hamu ale dongan, pangalaho ni hamagoan ni donganta na hona uhum on, jala sian na otik dipungka, gabe lam ganda di laonlaon ni ari. Matua songon I do angkal ni sibolis mangago manisia, mangela rohanasida, asa garis maradophonangka parhitean ni asi ni roha ni Debata na manogu jolma tu hasonangan nian. Asa ingkon dungo hita jumaga dirinta ro di urat ni dosa na di bagasan  rohanta marningot hata ni Apostel na mandok : Itapeakhon ma saluhut na pasorathon hita dohot angka dosa I, na girgir  mangkaliangi hita, marlojong ma hita, marlojong ma hita marhitehite habengeton ni roha tu paraloan na diri di jolonta I, huhut mamereng dompak parmulaaan dohot ujung ni haporseaonta i. Jaga ma rohamuna, dungo ma hamu jala martangiang, asa unang bongot hamu tu bagasan pangunjunan. Sadari on, molo dibege hamu Hata ni Tuhan I, unang papir hamu rohamu ; mardongan biar dohot lomos ni roha ma ulahon hamu hangoluanmuna be. Disolsoli be rohana ala ni dosana, asa unang marsombusombu Debata di ibana, jala unang marsak rohanta muse mida manang ise sian hita on. Sai pasada hamu ma rohamuna marparangehon parange na hombar tu lomo ni roha ni Debata, asa tau tumpal halalas ni roha ni Tuhan Jesus hamu sogot. Antong Debata ma umpungka ulaon na denggan di bagasan hita, ro di hagiot ni rohanta, ro di ulaon saut, guru lomo ni rohaNa. Dibahen I itajou ma GoarNa na badia I huhut manopoti dosanta tu ibana.

 

Martangiang ma hita :

               Ale Tuhan Jahowa, Amanami na asi roha I ! Na bonar do Ho, pardosa ianggo hami. Alai husolsoli hami do rohanami ala ni I, jala diparhatopot rohanami do marnida dongannami naung hona uhum I, na tama do dohot hami on bali sian joloM ala ni godang ni dosanami, tung sura olo Ho mamaloshon tu hami na hombar tusi. Sai asi ma rohaM di hami, ale Tuhan Jahowa ala ni Tuhan Jesus Kristus Tuhannami, sai sesa ma dosanami sudena, ai marsak do rohanami ala ni i. Alai lehon ma Tondi Parbadia, asa tongtong dipaingot rohanami, asa lam dihabiari rohanami uhumMu, na madabu tu angka na tangkang marroha, jala asa lam margogo hami marparangehon parange  lomo ni rohaM ! Padungo hamijumaga dirinami, asa unang dais tu hami dosa ni angka naung bali sian angka parsaulian di harajaonMu. Alai tahe, ndang lomo rohaM mate halak pardosa, dipauba nian rohana, asa mangolu ibana, I do na pinangido ni rohaM, asa tarbahensa mulak tu huriaM. Antong pamalo jala paringgas ma rohanami mandabu sipaingot tu angka dongan na bali I, jala ajari ma hami marparangehon parange na tau tiruonnasida, anggiat mangune rohannasida mangulahi tu na denggan tu hangoluan I, sai tumpahi ma sipaingotnami tu rohan dohot tu roha ni halak na humaliang hami, asa sumuang marlas ni roha hami mida ibana, na mangarsahi hami nasailaon, asa tarpuji dohot GoarMu marhitehite Tuhan Jesus Kristus Tuhannami, na mangajarhon tu hami mandok :

               Ale Amanami na di banua ginjang ! d.u.

 

Pasupasu              :

               Dipasupasu jala diramoti Tuhan Debata ma hamu ! Disondakhon Tuhan Debata ma bohiNa tu hamu jala asi ma rohaNa di hamu ! Sai didompakhon Tuhan Debata ma bohiNa tu hamu, jala dipasaorhon ma dameNa tu tondimuna be ! Amen.

 

 

 

 

 

Komentar dimatikan

Parturena Mananom na Mate

I.            Mananom na mate

 

A. NA MAGODANG

 

Marende         : (Pinilit ende na marhahonaan tu angka na mate).

 

Jinaha sada ayat  : (pinilit sada sian na tarsurat dison).

         Ahu do haheheon dohot hangoluan, ninna Tuhan Jesus, na mangolu do ganup na porsea di Ahu, atik pe mate mate ibana, jala ndang mate be ibana ro di saleleng ni lelengna. (Joh  11 : 25 – 26). Amen.

         Manang : Nunga tarbondut hamatean tu bagasan hamonagan. Jo hamatean! Di dia do soropmi ? Jo naroko ! Di dia do hamonanganmi ? Alai dosa I do sorop ni hamatean. Dibahen I, mauliate ma rohanta tu Debata, na mangalehon hamonangan tu hita marhitehite Tuhan Jesus Kristus (1 Kor 15 : 55 – 57). Amen.

 

Martangiang  : (Jinaha  sada tangiang, pinilit sada sian na tarsurat dison).

         Ale Tuhan Debata, Amanami na di banua ginjang ! Nunga dilehon Ho AnakMu Tuhan Jesus Kristus tu hamatean ala ni dosanami, jala dipangolu Ho do Ibana, asa dapotan hatigoran dohot hangoluan hami. Asi ma rohaM di hami. Sai ajari jala apuli ma hami, asa unang mandele hami, ala naung dijou Ho dongannami on. Patogu ma haporseonnami jala pabenget ma rohanami mangkirim di hangoluan sogot, asa unang mangandungi hami, songon sipelebegu, na so marpangkirimon i. Sai taiti ma rohanami tu Ho, ai Ho do Sipangapul, jala Ho do haposannami. Na marsigantung tu Ho do hami sahat ro di hasusuda ni bohalnami. Amen.

         Manang : Ale Tuhan Debata, Amanami na di banua ginjang ! Na so marmula, na so marujung do Ho, ai na so olo suda angka taonMu, alai lam moru jala lam suda bohalnami di tano on, jala hatop do hami laho salpu sian hasiangan on. Songon I nang dongannami on, naung jinouM I tu ari na so ra suda I, nunga salpu sude ngoluba di tano on, jala nnga ditinggalhon saluhut arta na olo buruk i. Sai paingot ma hami taringot tu hasusuda ni bohalnami, asa hobas  hami laho masuk tu inganan na pina radeM, jala asa unang tarsonggot  hami, molo ro Ho manjou hami. Saio pahot ma haporseaonnami tu Ho, asa marhiras ni roha hami maninggalhon inganan pardangolan on. Angkup ni I apuli ma roha ni na marsak dison, I ma angka dongan ni na mate on, angka tondongna, angka alealena ro di sude angka na solhot tu ibana, asa unang mandele nasida ala ni sitaonon on. Sai taiti jala togu  ma roha ni hami on tu Ho, asa lam malungun rohanami di inganan na sonang di lambungMu, ala ni AnakMu Tuhan Jesus Kristus Tuhannami. Amen.

 

Marjamita      :

         Molo so marjamita, jinaha sada turpuk sian Hata ni Debata, na marhonaan tu angka na mate, dohot taringot tu haheheon ni daging sogot.

 

 

 

 

 

 

Marende         :

 

Pasupasu        : (di na laho manutup batang) :

         Dipasupasu Tuhan Debata ma ho laho gabe ruar dohot laho bongot olat ni on ro di saleleng ni lelengna ! Amen.

 

 

B. Dakdanak

 

Marende         :

 

Ayat sidohonon disi          : (pinilit sada sian na tarsurat dison) :

         Didok Tuhan Jesus : Loas hamu ma angka dakdanak I ro tu Ahu, unang orai hamu nasida,ai di angka na songon I do harajaon ni Debata. Amen.

         Manang : Ai di banua ginjang do sambulonta, sian I do itapaimaima Tuhan Jesus Kristus, Sipangolu hita. Amen.

 

Tangiang         : (pinilit sada sian na tarsurat dison) :

a)      Ale Tuhan Debata, Amanami na ibanua ginjang ! Ho do Ama ni nasa na targoar Ama di banua ginjang dohot di tano on. Tibu do dialap Ho dakdanak on tu inganan hasonangan na di lambungMi, asa malua ibana sian pangunjunan, sian hajahaton dohot sian pardangolan na di hasiangan on. Asi ma roham, sai apuli  ma angka na solhot tu ibana. Sai lehon tu nasida pangkirimon na mangolu, asa unang holan na di tano on dihirim nasida. Sai pangke ma habot ni rohanasida, asa rap nasida sogot dohot dakdanak on di hasonangan di lambungMi, ala ni AnakMu Tuhan Jesus Kristus Tuhannami. Amen.

b)      Manang : Ale Tuhan Debata, Amanami na di banua ginjang ! Na denggan do sude sangkapMu dohot pambahenanMu sian nahinan ro di saleleng ni lelengna. Diida Ho do nuaeng hami dohot dongan angka na marsak roha dison, ala tibu dialap Ho dakdanak on. Sian Ho do dijalo nasida dakdanak on, dung I dibuat Ho I muse. Ala ni I rap hami nuaeng pasahathon I tu Ho, ai Ho do nampuna hami ro di sude anakhonnami. Sai apuli ma nasida saluhut, asa unang mandele jala unang mangandungi nasida songon sipelebegu. Sai pabotohon jala patorang nasida, na denggan do sude ujung ni pambahenanMu. Sai lehon ma haporseaon na mangolu di hami on, asa unduk jala benget hami manaon jala asa marhiras ni roha hami paimahon Tuhan Jesus Kristus Tuhannami. Amen.

c)      Manang : Ale Tuhan Jesus, Anak ni Debata ! Ho do Tuhan jala aleale ni angka dakdanak. Mauliate hudok, ala dihophop jala dipamasuk Ho dakdanaknami tu HarajaonMu. Na pungu do hami nuaeng dison ala dialap Ho dakdanak on. Sai asi ma rohaM, apuli ma natorasna dohot angka sisolhotna, asa unang mandele nasida. Sai togu ma roha ni angka sisolhotna I, asa marhaposan  tu Ho nasida. Pangke ma langka ni dakdanak on manogunogu angka sisolsohotna I, asa lam malungun rohanasida tu banua ginjang. Sai sungguli haporseaonnami,

asa tongtong huingot hami : ndada na mago dakdanaknami, alai diramoti Ho do I paima pajumpang hami sogot dilambungMu. Amen.

 

Marjamita      : (Molo so marajamita, jinaha sada turpuk sian Hata ni Debata, na marhonaan tu angka na mate, dohot taringot tu haheheon ni daging sogot).

 

Marende         :

 

Pasupasu        : (di laho manutuo batang).

         Dipasupasu Tuhan Debata ma ho  laho ruar dohot laho bongot, olat ni on ro di saleleng ni lelengna ! Amen.

 

C. Di parbandaan

 

         Dung tinantan batang I, dohonon ma :

         Ale si Anu, sian tano on do parmulaan ni dagingmu, mulak ma I gabe tano; alai Tuhan Debata na manompa ho, dohot Tuhan Jesus Kristus, na paluahon ho sian dosa, dohot Tondi Parbadia, na manjou ho tu hangoluan na so ra suda, I ma mangaramoti orbuk bi bangkem, paima ro ari parpudi ! Amen.

 

Marende         :

 

Ayat sidohonon    : (jinaha sian tarsurat dison) :

         Martua do angka na mate marhitehite Tuhan olat ni on. Olo, ninna Tondi Parbadia I : asa maradian nasida sian angka ulaonna, ai na mangihut tu nasida do angka na niulanasida. Amen.

         Manang : Ai apala Tuhan I ma na tuat sogot sian banua ginjang martoletole mardongan soara ni sintua ni surusuruan ni Debata dohot mardongan sarune ni Debata. Dung I hehe ma jumolo angka na mate, angka na marhitehite Kristus.

 

Martangiang  :

         Ale Tuhan Debata, Amanami na di banua ginjang ! Ho do Debata nampuna hami ro di sude ngolunami, sai lehon ma hiras ni roha di hami, asa marlas ni roha hami paimahon Tuhan Jesus Kristus Tuhannami. Sahat tu tanganMu ma tondinami dohot dagingnami, asa unang lilu hami di ujung ni ajalnami. Sai lehon tondiM I manogunogu hami, asa diramoti hami. Molo hubolus hami rura nilinggoman ni hamatean i. Asi ma rohaM, sai pamasuk ma hami sogot tu hasonangan na sun denggan i. Amen.

         Ale Amanami na di banua ginjang ! d.u.

 

Marende         :

         Molo Pandita mananom : Asi ni roha ni Tuhanta Jesus Kristus dohot holong ni roha ni Debata Ama dohot parsaoran ni Tondi Parbadia I ma mandongani hamu ! Amen.

 

 

 

 

Comments (1) »

Parturena Parpadanan Nabadia

I.            Parpadanan na badia

 

A. DI GAREJA

 

Marende         : ( Ende na tongon tu ulaon na badia ).

 

         Asi ni roha ma di hamu dohot dame sian Debata Amanta dohot sian Tuhan Jesus Kristus.

 

Martangiang : ( Pondok sian roha )

 

Marjamita      : (Pondokpondok, alai ndang pola marjamita, molo naung marjamita  patujolo hian, alai huhut marguru tu pingkiran ni pandita I ma).

 

Pandita mandok   :

 

Hamu angka na hinalongon ni Tuhan Jesus  Kristus  ! Naeng panganonta nuaeng parpadanan na badia I, marningot tona ni Tuhan Jesus Kristus tu angka siseanNa. Dibahen I tapatangkas jolo rohanta, manang naung jumpang di hita, songon na pinangido ni Tuhan Jesus tu hita. Na mangapuli roha ni angka na mangarsakhon dohot na manopoti dosana do, umbahen dilehon Tuhan Jesus parpadanan na badia I, asa lam togu haporseaonta tu Ibana; angkup  ni I asa lam torang parningotanta di Ibana, horhonon ni panganon na badia i. Ingkon ingotonta Tuhan Jesus, naung sinuru ni Ama I tu portibi on, naung magusung dosanta, naung manggarar utangta, asa malua hita sian saluhut jea.Tuhan Jesus do singkatta mangulahon saluhut Patik ni Debata, asa dapotan hatigoran hita. Nunga sesa dosanta, nunga mardenggan hita tu Debata. I ma na nilehonNa jala na sinahaphonNa tu rohanta, umabahen na dipatupa Tuhan Jesus parpadanan na badia i. asa saor hita tu Tuhah Jesus, lapatanna : Ibana di bagasan hita jala hita dibagasan Ibana. Dibahen I tongtong ma taingot Tuhan Jesus jala tajamitahon hamamateNa, paboa naung diparahtutu rohanta : Tuhan Jesus mate ala ni dosanta jala mulak mangolu, asa dapotan hatigoran hita.

         Molo dung tajalo annon apulapul dohot pasupasu sian Debata, italehon ma rohanta dohot dagingta tu Ibana, asa Ibana nampuna hita. Tongtong ma taihuthon Tuhan Jesus, itaoloi ma HataNa jala lam badia ma pangarenta , paboa mauliate rohanta di Ibana. Angkup ni  I lam marsada ni roha, lam marsihaholongan, lam masiurupan ma hita sama hita, songon na tama di Huria ni Tuhan Jesus. Ai Tuhan Jesus do Ulunta, angka ruasNa do hita. Dilehon  Tuhan Jesus do Patik tu hita, I ma patik holong ni roha, jala didok : Sian on ma botoon ni saluhut halak, hamu siseanHu : Molo masihaholongan ham sama hamu.

         Antong tapaunduk ma rohanta di jolo ni Debata.         Martangiang ma hita !

 

      Ale Tuhan Debata, Parasi na sumurung, Amanami na di banua ginjang ! Asi rohaM, topot ma hami na pungu dison ! Andorang hupangan hami annon parpadanan na badia I, lehon ma Tondi Parbadia tu ganup hami, asa ditubuhon haporseaon na mangolu di hami, asa pos situtu rohanami di AnakMu Tuhan Jesus

 

 

Kristus na humophop hami dohot manesa dosanami. Nunga dilehon Ho anakMu Tuhan Jesus I tu hamatean, ala ni hami on. Sai lehon ma hami tu Ibana, asa saor hami dohot ibana. Ala ni I I do umbahen ro hami tuson, asa hujalo hami daging dohot mudar ni Tuhan Jesus I marhite sian panganon na badia i. Patongtong ma rohanami mangkaposi I, asa pos rohanami mangalehon dirinami tu Tuhan Jesus, ai Ibana do haporusannami, hangoluannami. Sai apuli ma rohanami na loja jala na sorat di hasiangan on, asa benget rohanami manaonnaon, nang adong haporsuhon  sitaononnami ala ni Ho. Pargogoi hami mansoadahon dirinami, asa tariihuthon hami Tuhan Jesus Tuhannami, jala asa malungun hami tu banua ginjang, asa sai masihol hami paimahon haroro ni Tuhan Jesus, na paubahon dagingnami, na olo mate jala na lea I, asa doshon dagingNa na sangap I dagingnami on di haheheon sogot. Amen.

 

         Ale Amanami na di banua ginjang ! d.u.

 

         Antong martangiang ma hamu di bagasan roha huhut tumangihon tona ni Tuhan Jesus laho padirihon parpadanan na badia I :

 

         Dibuat Tuhan Jesus ma sagusagu borngin I, uju tarjehe Ibana didok ma mauliate, dung I diponggoli ma I, diparlehon ma I tu angka siseanNa, huhut ma didok : Jalo hamu ma, jala pangan ma dagingKu do I, na nilehon tu hamatean humophop hamu. Bahen hamu ma songon I bahen parnigotanmuna di Ahu.

 

Jadi dung sun nasida mangan, dibuat ma panginuman I didok ma mauliate, dung I didok ma mauliate, dung I didok ma tu nasida : Jalo hamu ma, sude hamu manginum sian i. Ia panginuman on, padan na imbaru ma on marhitehite mudarHu, na niusehon humophop hamu bahen hasesaan ni dosa. Sai bahen hamu ma songon I bahen parningotanmuna di Ahu. 

 

         Antong ro ma hamu, nunga rade sude, dai jala ida hamu ma denggan basa ni Tuhan I, martua manang ise na marhaposan tu Ibana.

 

         (Diendehon Huria I ma angka ende na tongon tu ulaon na badia, andorang manjalo na badia I, angka dongan I).

 

         Didok Tuhan Jesus Kristus : Jalo hamu ma on, jala pangan ma ! DagingKu do I na nilehon tu hamatean humophop hamu. I ma mangaramoti jala pahothon rohamuna marhaporseaon di Ibana, asa di hamu hangoluan na so ra suda. Amen.

         Didok Tuhan Jesus Kristus : Jalo hamu ma on, jala inum sian I ! MudarHu do I, na niusehon humophop hamu bahen hasesaan ni dosamuna. I ma mangaramoti jala pahothon rohamuna marhaporseaon di Ibana, asa dihamu hangoluan na so ra suda. Amen.

 

Marende               :

 

 

 

 

 

Maratangiang      ma hita mamuji Debata          :

         Puji ma Tuhan Debata, ale tondingku, jala na sa rohangku di bagasan mamuji GoarNa n badia i. Puji ma Tuhan Debata, ale tondingku, jala sai unang halupahon denggan ni basaNa saluhutna. Ibana do manesa dosam sudena, jala Ibana pamalum angka sahitmu sudena. Ibana paluahon hosam sian hamagoan jala dilehon tu ho denggan basaNa dohot asi ni rohaNa. Parasiroha jala Pardengganbasa do Tuhan tu dosanta jala ndang dibaloshon tu hita hombar tu hajahatonta. Songon asi ni roha ni amaama tu angka anakhonna do asi ni roha ni Debata di angka na mangkabiari Ibana. Nunga tangkas dipatuduhon Debata holong ni rohaNa tu hita, di na mate I Kristus humophop hita, uju pardosa dope hita. Antong nda lam malua ma hita nuaeng sian rimasNa, dung gabe parpintor hita hinorhon ni mudarNa I ! Dibahen I, sai pujion  ni pamanganku dohot rohangku do Tuhan Debata olat ni on ro di saleleng ni lelengna. Amen.

 

Pasupasu        :

         Dipasupasu jala diramoti Tuhan Debata ma hamu ! Disondangkon Tuhan Debata  ma bohiNa tu hamu jala sai asi rohaNa di hamu ! Sai didompakhon Tuhan Debata ma bohiNa tu hamu jala dipasaorhon dameNa tu tondimuna be ! Amen.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

B. Di Huta

 

         Molo adong na marsahit pasang, na mangido sipanganon na badia I, lehonon do, molo na ringgas hian ibana marulaon na badia. On ma dohonon ni Pandita disi :

         Marhitehite Goar ni Debata Ama, Anak dohot Tondi Parbadia. Amen.

 

Martangiang ma hita       :

         Ale Amanami na maringanan di banua ginjang ! Na sangap, na badia, huhut Parasiroha do Ho. Asi rohaM tatgap ma hami, ai na marsak jala na loja do hami ala ni dosa dohot ala ni sitaonon di tano on. Na tunduk jala na bojok do rohanami nuaeng. Sai topot ma hami na pungu dison. Pasintong ma bagabagaM tu hami, manang tolu marhitehite GoarHu, di tongatonganasida do Ahu. Sai topot ma tongatonganami on jala pasaor ma TondiM tu hami, ale Tuhan Jesus Kristus Tuhannami. Amen.

 

DOHONON MA HATA SIPAINGOT TU NA MARSAHIT MANANG JINAHA HATA SIPAINGOTON

 

         Songon on didok Tuhan Jesus : Ro ma hamu tu Ahu, hamu angka na loja jala na sorat, hupasonang pe hamu. Buat hamu ma augangKu tu hamu, guruhon hamu ma sian Ahu, ai na lambok do Ahu jala na serep marroha asa dapotan paradianan hasonangan tondimuna.

 

         Ale dongan na hinaholongan ni Tuhan Jesus : dipangido ho nuaeng manganhon parpadanan nabadia i. Dibahen I paserep ma roham, topoti ma sude dosam tu Debata jala unang pangasahon burjum, asa tau ho manganhon sipanganon na badia on. Ai na mangapul na marsak roha jala na mangalehon gogo tu na loja do, umbahen na dilehon Tuhan Jesus sipanganon na badia i. Dibahen I molo marsak roham ala ni dosam, jala dilului do hasesaan ni dosam I, ai dohot do ho hinophop ni Tuhan Jesus. Ingot ma godang ni na porsuk, na tinaon ni Tuhan Jesus humophop ho, ala ni holong dohot asi ni rohaNa. Asi ni roha dohot hatigoran ni Tuhan Jesus, I ma pangasahon asa tongtong tiur di ho dalan tu banua ginjang. Dibahen I andorang dipangan hoo sipanganon na badia I, pasahat ma dirim tu Tuhan Jesus, asa didongani jala diramoti Ibana ho jala asa dilehon ibana Tondi Parbadia pasonagkon roham. Antong benget jala saotik do I martimbangkon hasonangan sogot. Jala molo naung mauliate roham di Tuhan Jesus songon na tama, unang ho marpandelean, unang marungutungut, ai gumodang do na tinaon ni Tuhan Jesus sian na tinaonmu. Gotaphon roham sian portibi on ; sesa sian roham saluhut sala ni dongan na marsala tu ho, asa disesa Debata dosam na godang i. Ia tano on paradianan jala inganan   satongkin do, ndang adong na hot dison. Di banua ginjang do inganan na sonang jala nahot ro di saleleng ni lelengna.

         Paunduk ma roham di jolo ni Debata jala ihuthon hata ni tangiang on dibagasan roham.

 

Martangiang ma hita       :

         Ale Tuhan Debata, Amanami na di banua ginjang ! Parasi roha godang do Ho ; ditangihon Ho do anggukangguk ni na dangol marpaniahapan. Diida Ho sude na masa di ahu ! Na targogot situtu do rohangku ala ni bernit ni sahit, na hutaon nuaeng. Sai asi ma roham di ahu, ale Debatangku ! Sai sesa ma ma dosangku, sai unang tulakhon ahu sian joloM. Lehon ma gogo tu ahu, asa benget ahu manaon, manang sadia leleng nari pasombuonMu ahu di tano on. Pasabam ma rohangku, ai Ho do Sipangapul ; TondiM na badia I ma manogu ahu di dalan sidalananku.

         Sai unang alang asi ni rohaM di ahu, ai nunga dilehgon Ho AnakMu Tuhan Jesus Kristus Tuhanku, humophop ahu, nunga diporsan Ibana sude dosangku, jala Ibana do hupangasahon. Ibana do hangoluanku ! Molo tung jouonMu nama ahu, sai asi ma rohaM, pamasuk ma ahu tu hasonangan salewleng ni lelengna ala ni Tuhan Jesus Kristus Tuhanku. Amen.

         Antong na tutu do, disolsoli ho roham ala ni angka pambahenanmu, na so tama, jala diparhatopot ho sude dosam, jala dipangido ho asi ni roha ni Debata manesa dosam, jala pos do roham di Tuhan Jesus, na patupahon hasesaan ni dosam.

 

         Molo songon I roham, dok ma : Olo.

         Alusna           : Olo !

 

         Antong nunga disolsoli ho roham ala ni pambahenanmu, angka na so tama, jala dipangido ho asi ni roha ni Debata manesa dosam, sai sahat ma tu ho na pinangidom. Mangasahon Goar ni Tuhan Jesus do hudok hata on : Pos ma roham, nunga sesa dosam, nunga sesa dosam !

 

         Ale Amanami na di banua ginjang ! d.u.

 

         Martangiang ma ho di bagasan roha huhut tangihon tona ni Tuhan Jesus laho padirihon  parpadanan na badia I :

         Dibuat Tuhan Jesus Kristus ma sagusagu borngin I, uju tarhehe Ibana, didok ma mauliate, dung I diponggoli ma I, diparlehon ma tu angka siseanNa huhut  ma didok : Jalo hamu ma jala pangan ma, dagingKu do I, na nilehon tu hamatean humophop hamu. Bahen hamu ma songon I bahen parningotanmuna di Ahu. Jadi dung sun nasida mangan, dibuat ma panginuman I didok ma mauliate, dung I didok ma tu nasida : Jalo hamu ma, sude hamu manginum sian i. Ia panginuman on, padan na imbaru ma on marhitehite mudarHu, na niusehon humophop hamu bahen hasesaan ni dosa. Sai bahen hamu ma songon I bahen parnigotanmuna di Ahu.

 

         Nilehon ma sipanganon na badia I tu na marsahit i.

 

         Didok Tuha Jesus Kristus : Jalo ma on jala pangan ma : DagingKu do I, na nilehon tu hamatean humophop ho. I ma magaramoti jala pahothon roham marhaporseaon di Ibana,a sa di ho hangoluan na so ra suda. Amen.

         Didok Tuhan Jesus : Jalo ma on jala inum sian I : MudarHu do I, na niusehon humophop ho bahen hasesaan ni dosam. I ma mangaramoti jal pahothon roham marhaporseaon di Ibana, asa di ho hangoluan na so ra suda. Amen.

 

         Antong, itadok ma mauliate tu Debata, ala dilehon Ho tu ahu arta na sumurung I na sian banua ginjang marhitehite Tuhan Jesus Kristus Tuhanku ! Dipuji tondingku do Ho, ale Tuhan Jesus, ala naung dipadomu Ho ahu tu Debata. Ndang be habiari hamatean, ai nunga monang ahu dibahen Ho, Sipangolu ahu Na mangolu do Tuhan Jesus Tuhanku, ahu pe mangolu do, jala toguonNa do ahu tu hasonagan I. Asi ma rohaM di ahu, ale Debatangku ! Sai lehon Tondi Parbadia tu bagasan rohangku, asa lam togu haporseaonku, asa dibuhai rohangku manatap tu ujungna sogot, asa marpangkirimon  na mangolu ahu, nang pe hutaon parsahitan. Nang pe mardalan ahu di rura nilinggoman ni hamatean, debatangku do mandongani ahu dohot manogu ahu. Nang pe lam muruk jala tanggal daging on, paheheonNa do I songon Tuhan Jesus Tuhanku na pinaheheNa i. Dung I, dung mulak mangolu ahu, ingananku ma huta ni Debatangku ala ni Tuhan Jesus Kristus Tuhanku. Amen.

 

Pasupasu              :

         Dipasupasu jala dirramoti Tuhan Debata ma ho ! Disondangkon Tuhan Debata ma bohiNa tu ho jala  asi ma rohaNa di ho ! Sai didompakhon Tuhan Debata ma bohiNa tu ho jala dipasaorhon ma dameaNa tondim ! Amen.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Komentar dimatikan

Ikuti

Get every new post delivered to your Inbox.

Bergabunglah dengan 2.779 pengikut lainnya.